Duh jait noh ki stad Khasi, na ka kyrdan IAS, IPS

Khyndiat sngi mynshwa, ka la mih biang ka result jong ka eksamin UPSC, hynrei kaba sniewbok, ka long ba ym don satia, wat tang uwei ne kawei na ki samla Khasi, kiba jop, ha ka kyrdan IAS lane IPS bad kane ka la jia (imat) la kumba 10 snem kynthih, ba ka jaitbynriew Khasi, kam don satia, wat tang uwei u ophisar jong ka sorkar India; katba ki jaitbynriew Kuki, kiba don ha ka jing ia umsnam, la shisnem kynthih, hynrei, ki dang don haduh 5 ne 6 ngut, kiba la pyndep ia ka eksamin.

Ka jingjia, ka dei kaba sngewsih sat, na bynta ka jaitbynriew Khasi Pnar jongngi, namar ba kine ki dei ki ophisar, kiba peit ia ka jingthaw ia ki ain ki kanun bad kumjuh ia ka synshar khadar lane ia ki jingtreikam jong ka sorkar, kaba ngi khot Legislative bad Executive bad kumta lada u dkhar, uba na ri thor, un wan ban synshar ia ka Ri Khasi, ha kaba um tip ia ki ain ki kanun bad ki dustur ki riti, kumta un shu nion beit, da ka jingsngewthuh jongu lane da ka dustur, kaba u ju leh sha la shnong sha ri thor bad kane kein, ka dei ka jingma kaba la nang ktah bad pyntlor noh ia ka hok jong u paidlang ka Ri Khasi Jaintia.

Ha kiba kum kine ki sngi, ba ngi don ki MLA, kiba duna kyrdan lane kiba tlot ka bor shemphang lane kiba pyrkhat tang ban kamai ialade, da kaba ki jop elekshon, kumta ka donkam eh, ba ngin don ia ki ophisar, kiba tip, ia ki ain jongngi ki trai shnong, lada dei ha ka khyndew ka shyiap, lada dei ha ka dustur riti, lada dei ha ka jingwan tuid ki briew kiba nabar, ka khaii pateng bad kumta ter ter bad kiba sngewthuh ruh ia ki ain, kiba kynthup ia ka Sixth Schedule bad nangta ia ka Land Transfer Act, nalor kiwei pat.

Kane ka mat, kam dei kaba rit bad ngi donkam kyrkieh ia ki nongialam kiba stad bad kiba iar jingmut, ba kin sei mar mar ia ki samla jongngi, ba kin poi sha kane ka thong, namar ba ngi dei ban tip shai, ba u myntri rangbah lane u myntri sorkar lane U MLA, um dei satia uba thoh ia ki ain bad ki jing pynbna jong ka sorkar, hynrei ka shong ha ka jingstad jong u ophisar, ban pyn kylla bad pynkyllain ia ki kyntien, katba u sngew iahap hi ma u.
Ka sorkar jylla, ka dei ban sei noh mardor ia ki skul bad ki nonghikai kiba bit, na ka bynta ba kin pynmih ia kitei ki ophisar jong ka sorkar India, kiba dei ban don ha ka Meghalaya Cadre bad ba kin pynkhlain ia ki ain ki kanun bad ki dustur ki riti jong ka jaitbynriew.

Kaba sngewsih, ka long ba ha kine ki sngi, ki don ki nonghikai, kiba pynthnem ia ka jabieng jong ki samla (wat ki bym pat ioh vote) ba kin ia shongshit ha ka politics bad katei ka buit, kam iarap satia ia kito ki samla lane ia ka lashai jong ka jaitbynriew, hynrei ka pynmyntoi ia kato ka seng sain pyrthei, kaba ki samla, ki la shah pynthame, katba ka lashai jong kito ki samla, kan nang tlor bad kan nang hiar bad kin nang bang ia ka politics bad kin duh noh ia ka jingbang ban iakhun ha ki eksamin kiba heh bad kiba eh.