Don jingdkoh aiu, ia ki pulit Jylla?

Ki pulit ka jylla, ki ju shah kynnoh, na ka por sha ka por, khamtam, haba don kano kano ka jingthut ia ka suk ka sain bad haba peit, la imat, kumba ka jing kynnoh jong kiba bun, ka don ruh ka jing shisha.

Ka la mih ka jing kren pynrem ia ki pulit, halor ka jing bym lah jongki, ban kem ia U Vicky Dey, uba la kren da ki ktien pohjait poh rati suda ia ka jait bynriew Khasi bad ha kine ki sngi lei, ula kren thad rong, sa ia U bah Sanbor Shullai, uba dei u myntri sorkar jylla; hynrei kaba pyn lyngngoh, ka long ba ki pulit jylla, kim lah ban leh eiei, la shisnem tam.
Ki pulit ka Mizoram, ka Nagaland, ka Arunachal Pradesh, Manipur bad wat ki pulit Assam, haba don kiba kum kine ki jingkren pohjait jait bynriew, ki ju leit wad sak sak bad la kynmaw, ba uwei u samla, uba na Punjab, ba u kylla ba mut syndon, ynda haba u shah rah sha Itanagar, namar ba u kren bein ia U MLA.

Nalor ka jingshah pynrem jongki, halor ka jingleit siat iap, ia u briew, uba pang hapoh jingthiah; ki pulit, ki shah woh daw tyngeh, ba haba don ki jing ia kynad ha khappud, ki ju ieng shadien jong u paidbah, katba ki dei ki trai shnong, trai jaka, kiba ialam na khmat na khmat, lada dei ha Umlaper, lada dei ha Langpih, lada dei ha Khanduli bad kat shaba don kitei ki jingjia ia kynad, ki paidbah ki mih dalade hi, ban ia pyni bor bad ki pulit Assam.

Haba shu peit, la iohi, kumba ki pulit jylla, ki dei kiba la shah hikai bha, ban pahara tang ha Motphran, ha Iew Mawlong, namar, ba ha kiba bun ki khep, tang shu don ino ino i jingjia ba malu mala, la syrtap da ki pulit suda bad kaba nang pyni jli shuh, ka long ba ki pulit kiba kieng suloi, ki leit byrngem byrsit bad ia pyni bor, ia ki nongdie madan, ia ki nongdie waidong lane ki riew paidbah, ki bym don iktiar suda.

Ki don shibun ki jingjia, kiba sah kut ha ka jing antad bad kiba la aiti ha ki pulit, ba kin pyndep bad kawei na kitei, ka dei ka jing shah pyniap ha Ichamati, kaba la iaid la shisnem tam, hynrei, ka bym kdew lynti satia shaei shaei ruh bad nangta ki don sa shibun kiwei pat ki kam pyntriem kiba shu sah tang ha ka jing ia suba sniew suda bad ngi donbok, ba tang kito kiba lah bor ban leit sha kashari, ki kham ioh jing shisha, halor ki jingjia ba sniewbok.