Development lyngba ki jingtei ne lyngba ka jabieng?

Ka sorkar India bad ka sorkar Jylla lane khamtam ki riew sain pyrthei, ba kynthup ia ki MLA, MDC, ki bunkam ha kine ki sngi, ban iakren halor ki kam pynroi; hynrei ka mat kaba ha khmat duh, ka dei, ka kam pynroi aiu, ba u paidlang ka Ri, u donkam?

La ju iakren bha, ha ki por elekshon, la u paidbah, u donkam ia ka dohkha lane u donkam ia u ryngwiang ban khwai dohkha.
Ka sorkar India, dang shen, ka la pynduh noh ia ka tnat jong ka human resource development (hrd) lane kaba mut ban tei ia ka longbriew manbriew bad ka la pynmih da ka tnat pule puthi, lane ka Education Department bad katei ka thew, ba ka dei beit, tang ban ia wad jingnang jingstad.

Hangne, ngi wan rah ia ka mat, la ka donkam ka jingroi kaba iohi da ki khmat, lane ioh ngi kham donkam pynban ia ka jingroi kaba pynkhraw ia ka jabieng lane ka jingstad jong u briew bad katei ka mat, ka donkam bha, ha kum kine ki sngi, ba ngi dawa ia ka MRSSA, ka Inner Line Permit bad kiwei.
Ha ka jingialang jong ka North Eastern Council (NEC), la iohi ia shibun bah ki mat jing iakren, kiba mih halor ka roi ka par jong ka thain, ha ka trei ka ktah, ha ka ioh ka kot, hynrei ka mat ban tei ia bor jabieng lane ka lynti ban sei ia ka jingstad kam don satia.

Ngi iohi da la ki jong ki khmat, ba ngim da sahdien ha ka roi ka par, ha ka jingtei ia ki surok bad kiwei; hynrei, ynda ialeh matrik, ngi don shadien ia kiwei pat, ynda ialeh higher secondary, ruh ngi long hi kumta bad ngim don ia ki IAS, lane ki IPS la ki jong bad haduh mynta, ngi hap ban shim, da ki briew kiba nabar, ia baroh jait ki jingtrei, kiba donkam ha ki Bank, ha ki hospital, ha ki kam shipai bad ha kiba bun kiwei pat ki ophis.

Katba ngim pat lah ban tei ia ka jabieng jong u briew, kumta, ki kam pynroi, kin shu long tang ki jing pyn thaba suda, hynrei ki dei tang ki dohkha, ha kaba kiba donbok, ki ioh ban bam; hynrei kan long ka jing myntoi kaba khraw, lada ngi ioh ia ka jingstad kum ka jong U Mukesh Ambani, U Elon Musk, U Mark Zuckerberg, U Abdul Kalam bad sa shibun kiwei ki khraw spah, kiba pyn donkam ia la ka bor jabieng bad ka dei ka kamram jong ka synshar khadar, ba kan plie lad ia ki samla, ba kin ieng ha la ki kjat bad ba kin thaw ia kamai kajih, ym ba kin shu peit kai ia ka jingtrei jong kiwei!