Dang donkam ban tynruh ILP sha Delhi?

Ha ki khyndiat sngi ba ladep, la iohi ba u myntri rangbah ka Jylla, u leit ia kynduh biang ia U Amit Shah ha Delhi, ha ryngkat ka jing synran jong u symbud myntri rangbah lem bad u myntri sam um.

Kaei ka jingmih na ka jing iakren, um shym la iathuh satia bad la imat, kumba ka jing iakren, ka la sdang jah lynti hapdeng ka jingkwah ka sorkar Jylla bad ka jingkwah ka sorkar India.

Hynrei kane ka mat ban leit khroh leit kjor ia u myntri ka sorkar India, kam don jingmut shuh, namar ba kane kam dei ka jingkwah jong u myntri rangbah marwei, lane ka jingkwah jong ki myntri cabinet jongu, hynrei ka dei ka rai jong ka iing dorbar jylla hi baroh kawei bad lada ka sorkar India, kam sngew iahap ban ai, ia kaba ka kwah ka dorbar jylla; kata te, ka la long ka mat kaba eh than ban dang iakren, namar ka pyni, ba ka bynta jong ka synshar paidbah lane kata kaba ki ong federal democracy, kumba kam trei kam pura shuh.

Halor kane ka mat, U Conrad Sangma, ula dei ban long adkar shibun, namar ba kane ka jingleit rung leit mih sha iing jong ki myntri sorkar India, teng teng kam itynnad satia, kat ia ka kyrdan u myntri rangbah ka Jylla.
Kam dei tang kata, hynrei haba ka dorbar jylla, ka la dep rai bad lada ka sorkar India, kam sngap, kumta ka jing iakren, ka la dei beit ha ka kyrdan jong u myntri rangbah duh, lane ba ki lai ngut ki MP, na ka Jylla, ba kin phalup ha ka iing dorbar jong ka Parliament.

Ngim tip ia ka jingmut jong ka seng BJP, ha Delhi; hynrei ki BJP na ka jylla, te la iohi, ba ki atnud shi katdei ia kane ka sorkar NPP bad kam dei tang katta, wat U Himanta Biswa Sarma, uwei u myntri ba paw jong ka Assam, ula kynnoh ba ka NPP, ka dei tang ka seng rit bad ka seng tit (kumba ula kren ha Manipur ha ki taiew ba ladep).

Ka don sa kawei ka mat, ba hap ban ia kren bad kata ka long, ba ki myntri rangbah lane wat ki myntri cabinet, ki ju her Delhi, ha ka por ba ka don ka jingialang jong ka Planning Commission, ha ki por kiba mynshwa; hynrei, lada u myntri rangbah lem bad ki myntri sorkar, ki kylla long noh ki nong leit rah memorandum sha Delhi; kata ka la pyni ba ka dei ka juk kaba thymmai shisha jong ka synshar paidbah ha kine ki sngi bad lada ka long kumta, la i donkam noh da ka mini secre teriat pynban ha Delhi ruh.

Ka NSCN (IM), dang shen, haba ka la ngiah ban iakren bad ka sorkar India, ka dawa ban iakren beit noh bad u myntri rangbah duh bad ka dei ban long ruh ha ri nongwei; kumta lada ka seng lehnoh, ka nud haduh katta, ka sorkar Jylla, ka dei ban dawa beit ia la ki jingdonkam ha khmat jong u myntri rangbah duh.