Dang donkam ban jied nongmihkhmat?

Ka jing kynud sur lane kaba shu siaw, kam dei kaba ki ju leh tang ha ka thain Khadar shnong, lane ha Kongthong, hynrei ki briew kiba shong sha Riwar, ki ju don ka jingmlien ban ia kynto paralok, haba iaid ba ieng, da kaba siaw, ba rwai, kaba phawar bad kumta ter ter, hynrei ka Kong thong, ka la iaid shakhmat bad ka ioh ia ka nam, kum ka shnong kaba shu siaw lane kynud sur.

Ka mat, kaba ngin iakren hangne, ka long halor ka jing donbok jong ka shnong Kongthong, ban ia kynduh ia U Rakesh Sinha, U MP ka Rajya Sabbha, uba la sngew shoh jingieid ia katei ka shnong bad halor katei ka mat, ula sdang ban pynpoi ia ki kam pynroi sha ka thain Khadarshnong, kaba dang sahdien ha bun ki liang.

Ym tang katta, la iohi, ba ka jingnud bad ka jingshlur jongu, ka pynlong wat ia U MLA bad U MDC, ba kin long ki nongbud jongu, ha kaba U MDC ruh, u sngew hun mynsiem ban tyrwa skhim lem sha katei ka shnong, kumba la lam khmat da U MP.
Ka mat hangne, ka long, ba lada U MP, uba na sha ri thor, u lah ban leit iuh kjat khah khah, sha katei ka shnong, u lah ban iarap ha ka roi ka par, kumta kajuh ka jing kylli, ka long ia ki arngut ki MP jong ka jylla, U MP ka Lok Sabbha bad U MP ka Rajya Sabbha bad la kitei ki la leh aiu, ia ka roi ka par jong kiba bun ki shnong ha Ri Khasi, Jaintia bad la ki la ju pyrshang ne em ban sumar ia ki, kumba u kitkhia utei U MP na Rithor.

Ngi hap ban iakren ia kata, namar ngim pat ju iohi, ia U MP, ba un leit ban tyrwa ia ki skhim ba bun sha kano kano ka shnong, haduh ha kine ki sngi, ban leit wad ia u myntri rangbah, ia ki myntri sorkar jylla, ia ka sorkar pdeng; hynrei kitei ki rieh tngen ialade, tang ha kaba sam da ka shi lak ar lak, na ka MP skhim ba ki don.
Ka jingroi jong ka Kongthong, ha ki snem ban sa wan, kan long namarkata, ka iit khmih ia ki MLA/MDC bad wat ia ki MP jong ka jylla bad ba kan don ka jing ia nujor hapdeng ki nong mihkhmat, kiba la jied da u paidbah, lane u lah pynban U MP, uba shu jied hi da ka sorkar India.

Na katei ka jing shisha, kan sa poi ka por, ba ki seng heh jong ka India, kin thung shibun ki politician ba shisha, kum ki MP sha Rajya Sabbha, ha kaba kin trei ia ki kam pynroi, sha ki jylla, ba sahdien; kumba la pyni dak da U Rakesh Sinha.