“Dain” ai ka DC, ia ki shipai Gorkha

Ka jingjia, kaba la jia ha ka Lah Sngi U Blei, ka la pyn kyndit shkor ia ki nongshong shnong ka Mawshabuit, ia ka sorkar bad ia ki kynhun sengbhalang; hynrei katei kam dei satia ka jingjia, kaba dang thymmai, pynban, ka dei kaba la rim shibun, tangba ka sorkar jylla, ki nongmihkhmat MLA, MDC bad MP, kim ju nud satia ban ang tang shi kyntien ruh bad kumta lyngba ka jing iai shah jem; ki paidbah, ki mad ia ki jingeh bad ki jingleh haramni jong ki shipai na ka por sha ka por, ha kaba ki khang ia katei ka khyrdop, kaba ia leit ia wan bad nangta ki ktah kti bad pyni bor ia ki riew paidbah, kiba iaid ia la ka lynti.

Ka DC thymmai, kaba mynta, ka pyni, ia la ka jong ka jingstad bad jingnud jongka, da kaba ka leit jurip hi dalade ia katei ka jaka bad nangta, ka ia kynduh bad ki shipai bad pynbeit syndon ia ka leit ka wan jong ki paidbah, ha katei ka jaka, ha kaba ki heh sorkar, kim shym la nud satia ban ang baroh shi katta.
La sngewthuh ba ia katei ka lynti iaid, yn peit hi noh da ki pulit jong ka jylla bad katei ka dei hi ruh kaba dei, namar ba katei ka dei ka surok paidbah bad kumta ki shipai, kim lah ban tuklar ia ka iaid ka ieng, ki kali ne ki briew, lait noh, sa tang lada jia ba don, kiba leit tam pud, sha ki jaka sah jong ki shipai.

Ha kane ka kynti, lyngba ka jingnud jong ka DC Shillong, ka la dei ruh ia ka sorkar jylla, ba kan shim khia bad leh stet ia kane ka kam bad kata ka long ban weng noh syndon ia katei ka khyrdop, kaba don ha katei ka jaka, khnang ba kan nym mih shuh ka jingeh, na ka jingleh hangamei ki shipai Gorkha ia ki paidbah.
Kane ka jingjia, ka la dei hi ruh ban pyn kyndit ia ki khun samla jong ka Ri bad kumjuh ia ka sorkar jylla, ba lada ki kwah ba ki bor shipai lane ki heh jong ka sorkar India, ba kin niew burom bad ithuh; ki dei ban pynmih shibun ia ki ophisar IAS, kiba dei na la ka jong ka jait bynriew.

Kaba sngewsih, ka long ba ngi don ia ka jing ia kajia pud bad ka Assam bad lada ngi don ia ki IAS, ki IPS, ki ban tuklar; khlem pep, ki ophisar ka Assam ruh kin nym nud ban leh bym salia, namar ba ki ophisar IAS, ki dei kiba la ithuh da ka sorkar India; ym kum ki MCS, ki MPS, ha kaba la ithuh beit tang da ka Meghalaya bad ka Assam ruh kam salia satia bad lada ioh lei sa ki myntri sorkar kiba tlot, hangta la shu shah sangah katba mon.