Byrngem ka BJP, ban mih noh na ka sorkar MDA

Ngi la dep thoh teng kham mynshwa, ha kane ka kolom, ba U President ba mynta jong ka seng BJP, u dei uba khlain bor shibun, namar la iohi, ba u thalain dain dain pyrshah ia u myntri rangbah ka Jylla bad u pyni, ia ki mat kiba ka seng jongu, kam sngew iahap.

Ha kane ka kynti, ngi iohi, ba utei u nongialam jong katei ka seng, ula byrthen ban mih noh na ka sorkar Meghalaya Democratic Alliance (MDA) bad hangne te ngim tip, la u kham khlain bor ma u, ne ki khlain bor ki arngut ki MLA jongu; hynrei ban iakren ban ha kiwei ki seng (lait noh ka Congress), ngi tip shai ba ki nong kitkam, kim don bor ne don dor eiei ha khmat ki MLA.

Hynrei ka mat, kaba ngin iatai hangne, ka long halor ka jing kynnoh bamsap jong u heh BJP, ia ar tylli ki Executive Committee, ba la khlieh da ka NPP bad to ngin ia kynmaw bha, ba um shym la khyllie eiei pyrshah ia ka Executive Committee ba la khlieh da ka UDP ha Khasi District Council bad ka jingwad jingtip paidbah jongu, ka leit sha ki ar tylli ki EC, ba ialam da NPP bad kajuh ka jingwad jingtip, kam shym dei pyrshah ia ka UDP ha KHADC.

U nongialam ka BJP, u kren ar jingmut (i) u kwah ba ki MDC jongu, kin ioh shong shuki lang ha ki ar tylli ki EC (ii) u kynnoh ba ki dei kiba triem tasam ka jing bamsap bad u dawa ruh ban phah tohkit ha ka CBI bad kumta, na ka jingkren jongu, ka pyni, ba ka jingbamsap, ka wan kham ha khmat ban ia ka jing dawa shuki ia ki MDC jongu bad lada u kynnoh ba ki EC jong ka NPP, ki bamsap, ka pyni ba u shankhmat ia ka seng hi baroh kawei bad lada ka long kumta, ka jing iakren ban dang byrthen ban mih noh na ka MDA, kam iahap shuh satia, hynrei, ula dei ban mih noh bran bran khlem pynslem.

Ka jing bamsap, kaba haduh ban dawa ia ka CBI ba kan tohkit, ka dei kaba la jhor shibun bad kumta, ka jingmut ban dang don bynta bad katei ka EC, kam iahap shuh satia bad ka long pynban, tang ka jingshu pynbit thit lang ialade bad kumta ka BJP, kaba don jing iadei bad ka sorkar India, ka dei ban pynkhlain tyngeh ia ka jingdawa CBI pyrshah ia ki EC jong ka NPP, katba ialade ka dei ban mih noh shabar bad wat ban mih madan, kumba ki la dep rai ha ki khyndiat sngi ba ladep. Ka elekshon ka la jan bad ka BJP, ka dei hok namarkata ban bret noh ia ki jain linen ba jaboh, kiba ka ia phong lang bad ka NPP.