Burom ia ki paidbah, ko nongniah kali

U Bah Ardent Basaiawmoit, uwei na ki nong ialam jong ka Jylla, ha ki khyndiat sngi ba ladep, ula sei ia ki kyntien ai jingmut, ha kaba u khot ia ki nongniah kali, ba ka la dei ka por, ba kin burom kylliang ia ki paidbah bad katei ka dei, hadien ba utei u rangbah, u shim ba ka jing iakhih jong ki kali kamai, ka la jop, lyngba ka jing kyrshan bor bah jong u paidlang ka Ri Khasi Jaintia.

Kata ka dei ka jingshisha, namar ba ki kali, kin don katno tylli eh, lehse da ki shiphew, ar phew hajar tylli duh; hynrei ki riew paidbah, ki sngew synei ia ki bad kumta, ki iarap ba kin ioh pyn urlong ia ki jingdawa jongki.
Ka jinglong ki nongniah kali, khamtam ki nongniah taksi, ka dei kaba eh than ban iakren bad kawei na ka jingtlot jongki, ka dei ia ka jingbieit pisa, ha kaba ha ka shi khyllipmat, ki khniot bad ki thok ia ki nongshong kali, ban ioh kamai kham heh ialade hi (ym ia u trai).

Ha kine lei ki sngi, ba ka dang shu kut ka khlam corona, ka dor jong ka bai kali, ka kynrum kynram palat bad na ka jing iakren, ki riew paidbah, la sngewthuh ba ka bai kali kam pat hiar satia bad lada don kiba pynhiar ruh, ki ia pynduna tang khyndiat eh bad katei kam iahap satia, na ka dor ba ju ia kit briew, kumba ju leh mynshwa.
Sa kawei ka jingeh, ka long ba ki nongniah taksi, ki ju rai ma ki, ia ka jingleit jong ki briew bad kata ka long ba uba leit Laitumkhrah, un hap ban ap haduh ba kan da wan, katei ka kali, ym ba un leit ia ka jingkwah jong u nongshong bad katei ka dei sa kawei ka jingeh, kaba ki paidbah ki ia kynduh.

Ka mih sa kawei ka jingeh, kaba ktah bha ia ki trai kali bad kata ka long ka jingthep pisa, ha ar tylli ki pla bad kata ka long, kawei ialade bad kawei ia u trai kali bad halor kane, ka la dei ia ki trai kali, ba kin buh noh da kawei ka dor, kaba biang ia ki draibar bad nangta, ba kin nym shah shuh, ba kin lum bai kamai ialade man ka sngi.

Kawei pat ka mat, ka long ba nalor ba ka don ka dor sorkar, hynrei bunsien, ki seng nongniah kali, ki ju buh dor dalade hi bad katei ka dei ka kam beain kaba jubor than, ha kaba ka tnat pyniaid kali, kam dei ban shah satia.
Khadduh, ka jing khmih lynti, ka long ba ki nongniah kali, kin pynhiar dor bai kali, ba la hiar ka petrol, diesel da hynniew tyngka; hynrei katei ruh kam trei kam bad sa katto katne por, ngin sa iohi, ba kin sa sdang pynkiew bai kali.