Hap iakren noh sa ia kane ka phang, ban kham ia shut ka jingmut jing pyrkhat bad kata ka long, ba ki pulit, ki la bun than pleng ha sor bad ia kata, ngi hap ban peit nuksa, ba haba kawei ka longkmie, ka leit shong pyrshah ha khmat ka khyrdop Secreteriat, la iohi, pynban, ba ki don da ki bun phew ngut, kiba pahara lane lehse lah ban ong, kiba synran lem ia ka.
Ka mat, ka long, la ka donkam aiu, ban pahara da ki bun phew ngut, ia katei ka longkmie, kaba leit da ka met suda, ka bym pyn donkam, wat tang uwei u diengduh ruh bad kam don jingthmu hi ruh ban leit ia pyni bor bad no bad no, hynrei, ka kwah tang ban pyn iohsngew paidbah, ia ki mat jongka.
Kam dei tang katta, ha kawei pat ka liang, la mih hi ka jing ujor na U MDC jong ka Mawhati, ba haba u iathuh ia U SP jong ka Ribhoi District halor ka jingshah pyn ngat noh ki nar ilektrik, hynrei, na kaba u phone ha ka por 11.30, hynrei, utei u heh pulit, u leit poh ha ka por 4.00baje janmiet bad katei ka lah ban don shibun ki daw, lane ioh lehse ba um don briew, kiba don hajan katei ka jaka, ban leit ia pyni bor bad ki pulit jong ka Assam.
Kam dei tang kata, ngim lah ban klet, ia ka jingiap jong ki 4ngut ki mynsiem briew ha Shallang, ha u snem 2001 bad katei ruh ka dei ba ki pulit ka Meghalaya, kim shym la leh eiei bad ki shim kabu bad siat iap, ki pulit Assam, ia ki saw ngut ki mynsiem ba kordor bad sa bun ngut kiwei pat kiba mynsaw.
Kitei ki dei tang khyndiat eh ki nuksa, hynrei ka jingmut kaba shai, ka long beit ba ki pulit jongngi, ki duna bha sha ki khappud bad haba don ki jingjia sha Block I, sha Iongkhuli, sha Khanduli, sha Khanapara, ym don ba nud ban leh eiei, namar ba u pulit Assam, u wan da ki phew bos, katba ki pulit Meghalaya, ki don duna sha ki nong kyndong bad la imat, kumba ki syrtap kyrpang sawdong jong ka Secreteriat, haduh ba ka la pynrit mynsiem ia ki riew paidbah, ba kin leit rung sha katei ka ophis sorkar.
Ka Secreteriat, kam donkam satia ia ki pulit kieng suloi ne ki pulit bat lathi, hynrei, ki donkam tang ki pulit syntiat kiba nep jabieng, ba kin don sawdong jong katei ka ophis bad katei kan pynheh mynsiem ia ki paidbah, kiba ju shah thlia man ka por, ha kiba phong uniform, lada ki kwah ban rung sha katei ka ophis.
Phi don ban ong eiei?