Ka jingjied MDC, ka la iaid beit iaid ryntih ha kiba bun ki jaka jong ka Khasi bad Jaintia hills, hynrei ka elekshon ka duna briew bha ha Khasi Hills, wat la ki kham bun ki nongleit thep vote ha Jaintia hills, ha kaba ka jingkhein ha Khasi hills, ka long 76.77 percent, katba ha Jaintia hills, ka long 85.58 percent bad ka jing iapher, ka long kumba 10 percent.
Haba shu peit na katei ka jingkhein, ka pyni shai, ba ki nongjied MDC ha Khasi hills, kim da mon satia ban jied ia kitei ki dkhot sha District Council, katba ha Jaintia hills, ki kham shim khia ban jied ia ki dkhot thymmai bad ngim tip, ia ka daw tynrai halor katei ka jingiapher bad katei ka lah ban long, lehse ba ki Jaintia ki kham shongshit ia ka seng thymmai VPP lane ka lyer prah lane ioh lehse, ba ka jur ka jingbom pisa, katba ha Khasi hills, pat ba ka lyer seng thymmai, ka la kham kynjah lane ba kiba leit thep vote, ki dei tang kito kiba ioh pisa na ki kyrtong.
Ka jingngiah jong ki paidbah ban leit thep vote, ka dei ban don ka daw bad ka la dei ka kamram jong ki seng sain pyrthei, ban wad ia ka daw, khnang ba kin nang lah ban wad ia ki lad ki lynti kiba pynkwah ia ki paidbah, ban leit shim bynta sha kitei ki elekshon, namar la iohi, kumba kiba bun, ki kham shim khia pynban, ha ka elekshon ban jied Rangbah Shnong, ban ia kaba leit sha ki jaka thep vote ban jied MDC.
Ban shu pyni khyndiat ki daw, kiba ki District Council, kim ktik jingmut ia kiba bun, ki kynthup ia ka thungkam sop sop, kaba jia ha ki ar tylli ki Council, lada dei ha Khasi bad Jaintia hills bad nangta, sa ka jingduna ki kam pynroi, kiba wan na kitei ki Council sha ki paidbah bad ka jingbym don ki mat treikam kiba biang, na ka bynta ban pynneh pynsah ia ki riti ki dustur uba rim bad wat ka jingnang tlor jong ki bor jong ki Council, ha kaba iada ia ka khyndew ka shyiap, kaba dei ka kamram kaba ha khmat duh jongki.
Ka District Council, ka dei kaba wan ha shwa jong ka jylla Meghalaya bad kumta, ka donkam ka kyndon kaba shai bha ia ki mat treikam jongka, ha kaba ka la dei ban ioh ia ka jing ithuh da ka sorkar India hi, ha ki kam ki duk jongka, hynrei kumba ka long mynta, ka sorkar jylla, kaba dang shu wan dang 52snem eiei, ka tuklar lut ia ki kam jong ka District Council.
Phi don ban ong eiei?