Bun ki MLA, kiba khreh ban klim parti?

Ka elekshon, ka la nang hajan eh bad la iohsngew ba ki don bun ki MLA, kiba la pynkhreh ban klim parti; tangba katei kan jia, haduh ha shwa ka por thep kyrteng, lane ka ban long ha U Kyllalyngkot lane U Rymphang jong u snem 2023 bad haduh mynta, ki dang shu klim parti buhrieh, namar ba kim pat nud ban iathuh briew, namar ba ka don ka ain kaba shyrkhei jong ka Election Commission jong ka sorkar India.

Kane ka dei kawei na ki jinglong kaba pohjait bha, ha kaba u briew, uba la kwah phet na ka parti lajong, u kren arsap, u leh arsap bad u thok u shukor, ia ki paidbah kiba jied ia u, ia ki nong ialam jong kato ka parti bad kane kam iapher eiei, na ka kam buhrieh tnga, ha kaba ha iing, phi iashong ia thiah lang bad ka tnga lajong, katba ka jingmut jing pyrkhat, ka her sha ka tnga, kaba phi ia shong buhrieh bad kum ia kine ki riew arsap, kiba kwah ban makia na kawei ka parti, sha kawei pat, la dei ban sympat, da kaba pynrem elekshon syndon.

Haduh mynta, ngi iohi, ba ka jingphet seng jong U Mukul Sangma bad ki nongbud, ka long kaba shai bad ba u ioh ia ka jing ithuh jong u lamphang ka iing dorbar jylla bad nangta sa ka jing shah beh seng jong ki 5ngut kiwei pat ruh, ka don la ka jong ka nia, namar ba ka seng kaba pynjop elekshon ia ki, ka la rai ban beh noh, namar ki kam ialeh pyrshah jongki haba shai; hynrei, ka bym sngew iahap, ka long ia kiwei pat kiba shu kren phawer shaneng sharum, hynrei ki bym nud shisha ban pyllait ia la ka tnga trai bad leit sha ka tnga kliar.

Na kaei kaba ia sngewthuh haduh mynta, la don ki MLA, jong ka PDF, ki ban klim parti, ki MLA jong ka HSPDP ruh ki ban leh kumta hi bad lehse, ki lah ban don sa na ka TMC lane kiwei pat ki parti bad kitei ki dei ban sei ia ka daw, kaba shai, ba balei ki phet noh ia ka tnga kaba rim lane ia ka parti kaba rim jongki bad na kano ka daw, ba ki leit wad parti thymmai bad lada jia ba kim don ia ka daw kaba shai bad kaba beit, kumta ka la dei ban shu lynthaw, kumba lynthaw tiar jot, ba kin duh jait noh syndon, kum kine ki briew, kiba pyrkhat tang ia ka malade bad ki dei ruh kum kine ki jait briew, ki bym salia satia ban lilam ia u paidbah, na bynta ka jing kangar jongki bad ngi dei ban kynmaw ba ka kam shakri paidbah, ka dei kaba iai bteng bad kam dei satia, ba ka kut noh tang ha ka shisien ia thep vote, lane tang ha ka rta jong uwei u briew.