Bujli myntri kyndit U Conrad Sangma

U Conrad Sangma, myntri rangbah ka Jylla, ula pyn kyndit ia kiba bun, da kaba u shu bujli myntri kyndit ha ka sngi palei bad la iohi, ba ka jing bujli myntri ruh, ka dei kaba shu pynbeit khohreh kaba ha ka shisngi hi bad katei ka long ba ka tnat pathai khubor ka sorkar Jylla, ka pyntip ha kajuh hi ka sngi sha ki kotkhubor bad kam shym don ka jingkhot kaba ju long rukom, da ki invitation cad, hynrei, ka dei kaba shu pyntip da ka email. Ka jingleh ka iahap bha, na bynta ka kam bujli myntri, ba kan nym don ka jing ia kyan ia kynad, da kiba pyrshah ne kiba dei ban shah pynhap bad na kaei kaba paw, la iohi, ba ka jing bujli myntri, kam da dei ruh kaba kitei kiba shah weng, ki da hiar shuki don burom, hynrei ka dei kaba la shu phah pynhap jubor da u myntri rangbah.

Ha kane ka jing bujli myntri, la iohi ruh ba ym dei tang ki briew, kiba shah bujli, hynrei ia ki kam ruh la shim bad ai kylliang noh ha kiwei pat; bad kiba ioh nong bha, ha kane ka jingbate kam, ki long U bah Prestone Tynsong, myntri rangbah ba ar, ha kaba u ioh thymmai ia ka Food and Civil Supply bad nangta sa ka tnat Cooperation.

Uba kham duhnong, ha kane ka jing bate kam, u dei U bah Hamlet Dohling, uba la ju iakhun naduh ki por ba u don ha ka seng KSU, ia ka sobjek jong ka them metor, hynrei mynta, ula shah knieh noh ia ka tnat Urban bad ula ioh bujli da ka tnat Rural Development. Ym tang katta, ka la don ka jingshah ktah ruh ia ki kam jong U Ma Lahkmen Rymbui, myntri jong ka seng UDP, ha kaba la shim noh ia ka tnat khlaw na utei u myntri bad aiti sha U James Sangma, uba dei na ka seng NPP.

Kane ka jing bate kam jong U Sangma, khlem pep, kam shym la pynhun satia ia kiba bun, hynrei ka dei ka lynti pynban, ban pynmih ia ka jing ia pait ia pra ha ka kynhun MDA bad katei kan nang pyn ia shut hapdeng U bah Sanbor Shullai bad U bah AL Hek jong ka seng BJP, nangta hapdeng ki saw ngut ki MLA jong ka PDF, kiba don ha ka jing ia thap shuki ialade lade bad nangta, sa ka jing bate kam, ha kane ka kynti, la iohi, kumba ka seng NPP, ka la nang lum lut ialade ia ka doh pasoh bad ka pyllait ia ki paralok jongka, (wat ia ka seng UDP, kaba dei ka kynhun kaba heh), da ka doh shyieng, namar ba ka la nang shim ia ki tnat trei kam kiba kham kongsan sha la ki jong ki MLA.