Ka shnong Lyngkhong, ka dei ka shnong kaba rit eh bad kaba don ha khappud jong ka Pynursla Block bad ka Bangladesh, ha kaba ka jingdon jong ki longiing, kin don tang kumba 15 haduh 20 iing bad ki nongshong shnong, kin don kumba 100ngut antad, hynrei kaba lyngngoh, ka long ba ka sorkar Meghalaya, ka District Council lem bad ka sorkar India, ki la ia sylla ban bret noh ia katei ka shnong rit sha Bangladesh, namar ba ki leit ker sainar na sha khlieh jong ka shnong.
Ha ka jingleit jurip jong une u nongthoh, ha ki khyndiat sngi ba ladep, la iohi, ba ia katei ka shnong, la ker tawiar da ki khar Bangladesh suda; namar ba sha kjat jong ka shnong, ka la hap ha u mawthum bad ka don ka shnong hangtei hi ha syndah, kaba la tip, kum ka Lyngkhong Chera (ka shnong ha Bangladesh) bad kaba don kumba 500 ki longiing lane 3000ngut ki khlieh briew bad nangta sha ka liang ka diang jong ka shnong, ki don kita ki jaka kiba 150 yard, kiba la ieh shrah da ki trai bri bad kitei ki dei ki lynti iaid jong ki khar Bangla, kiba kit mar blak, ki jaka bam phlang jong ki masi jong ki dkhar Bangla bad kumta katei ka shnong, ka la shah ker sawdong ha ki khar Bangladesh suda.
Ka jaka kaba ka sorkar India, ka la ai ei sha ka Bangladesh, ha kata ka kyndon jong ka 150 yard, kan poi sha ka 6 Kilometre antad tang ha Raid Lyngkhat bad katei ka jaka, ka la kylla synlar noh ha kine ki sngi, namar ba ia ki diengsoh, ki diengkwai bad kiwei ki mar rep, la pom dakhor noh da ki khar Bangla bad ki trai shnong, kiba don sha shiliang jong u sainar, ki la shu long tang ki nongpeitkai, namar ba ia katei ka jaka ruh, ym don mano mano ban ai jingiada.
Kito kiba iaid sha katei ka thain, kin lyngngoh ruh ban iohi, ba kumno ia ka Lyngkhong yn ker sainar na sha khlieh jong ka shnong, haba ia ka Dawki, ka Pyrdiwah, ka shnong Lyngkhat, kiba don mar syndah jong katei ka shnong, la ker sainar na shakjat jong ka shnong bad ym shym la pyntreikam satia ia katei ka 150 yard, namar ba ki dei ki shnong, kiba la don lypa bad ka jingiateh, ka la don ha pdeng ka India bad ka Bang ladesh, kum ia ka shnong Dawki, ba ka jingker sainar, ka dei ban iaid na sha trai jong ka shnong.
Ka la don ka jingleh sting kaba jubor palat ia katei ka shnong bad kumta mynta ka don ka jingma kaba khraw ia ka shongsuk shongshngain jong katei ka shnong, khamtam ha kiba kum kine ki sngi, ba ka don ka jingiakynad kaba jur ha Bangladesh bad kaba long pyrshah India.
Kaba lyngngoh, ka long ba U MLA jong katei ka thain, um shym la lah ban pynsngewthuh ia ka jingma kaba lah ban ktah ia katei ka shnong, lada la iehnoh sha syndah jong ka Bangladesh ne da kaba ker sainar shiah na sha khlieh jong katei ka shnong bad nangta kaba lyngngoh ka long ruh ba wat ka MDC jong katei ka thain, kam shym la lah ban pynsngewthuh sha ka District Council, ba kan ia da ia la ki jaka ki puta, hynrei ka la shu ailad ia ka sorkar jylla bad ka sorkar India, ba kin ialeh katba mon, lem bad ki kontraktor, kiba pyntrei ia ka jingker sainar shiah, kaba shu kiew beit ter lyter ha ki bynta ba mar syndah jong ka shnong Lyngkhat.
Phi don ban ong eiei?