Bom naphang ki pulit, wat ia ka thei armet ruh kim riej shuh

Sangsot ia kiba pli ki nongshong shnong jong ka Mawkynrew, haba ki shu shah bom naphang, ha ka Lah Sngi U Blei, ha ki pulit, tang namar ba ki leit ban pyrshah ia ka jingtei ia ka skul Ram Krishna ha katei ka jaka, kaba ki la dep ai ban tei ia ka madan ialehkai.

Ngim donkam ban iakren jngai ia katei ka mat, hynrei ka don tang kawei ka jingshisha, kaba dei ban ia kren shai bad kata ka long, ba kumno ia ki riew paidbah, ba kynthup ia ki kynthei armet, kiba shu rah placard bad kiba khlem tiar ialeh, ban shu bom naphang bad siat lyer pynsat khmat haduh ban da pynmynsaw, ha khmat ki pulit kiba la shah hikai bha, ha kaba tang ha ka por ba leit pyrshang ban rung kam ruh, ki la dei ban mareh haduh 5 Kilometre antad bad kat kitei kiba la kilan met bha, kumno pat tang shu leit tur ki spah ngut ki riew paidbah, ki la tieng thot thot, wat la ki la dei ban shu ia lymbub para tyrpeng ruh, ki la kynrian dien hi.

Kumba la ong haneng, lada ka jingjia, ka long ha kano kano ka dur, lada ka dei kaba pyrshah tei iing skul ne kaba pyrshah ban tei madan ialehkai; hynrei katei kam dei ka kam ban shu shim kabu ban bom pynmynsaw ia ki kynthei khynnah, hynrei ka la dei ia ki pulit ba kin pynbiang ia la ki jong ki pyrton iada jongki ban teh lakam ia ka suk ka sain haba don ka jingiakynad bad iapher jingmut ha katei ka shnong.
Ka jingjia ha kane ka jaka, ka paw shai, ba ka don ka jing pyniaid bakla jong ki nongialam shnong, ha kaba uba rim bad uba thymmai kim iahap jingmut bad uba ai ia ka madan ialehkai, um tip, ba la ai ia kajuh ka madan ban tei iing skul bad katei ka pyni, ba ka don ka jingdkoh halor ka rukom treikam ki dorbar shnong, ha kaba imat, ia kat katei ka rai kaba ktah ia ka iap ka im jong u paidbah ka thain, hynrei, la shu rai khlem da don ki jingthoh jingtar kiba biang jong ka dorbar bad kiba dei ban sah kynmaw shirta bad kaba kum katei ka jingleh, ka dei ban don ka jingtian bishar jong ka kashari, namar ba la pynkhein ia ki kyndon treikam kiba dei ban long kiba beit bad kiba khuid jong ki dorbar shnong.

Katei ka jingjia, ka la pynhiar dor shibun ia ka rukom treikam jong ki pulit jylla, namar ba ki la leh tohmet ia kitei ki nongkyndong bapli bad katei ka kam, ka dei ban leit mar mar sha ka jingtohkit jong ka sorkar jylla, ha kaba u magistrate, uba don ha katei ka jaka bad u heh pulit, uba hukum ban bom lathi bad siat lyer pynsatkhmat, u dei ban shah ai jingsneng bad wat u myntri kam poh iing ruh, u dei ban shim ia ka jingkitkhlieh, namar ka jingleh tohmet ia ki riew paidbah, kiba khlem tiar, katba kine ki juh ki pulit, tang shu la poi sha Mukroh ne sha Garo hills, ki la khynniuh that that.