Bitar ka BJP, ia ka synshar shi iing lane ka dynasty politics

Ha ka jingialang jong ka seng BJP, kaba la long ha Hyderabad, ka don ia kawei ka sur, kaba shai bha bad kata ka long, ban kurup noh ia ka synshar shi iing ha Telangana, Tamil Nadu, West Bengal, Odisha nalor kiwei pat.

Ka sur kren, ka long kaba sngewbang, sngew shngiam bha; hynrei, kaba sngewsih, ka long, ba kat katei ka seng, ka shynrain pynban ia ka iing U Conrad Sangma, kaba ki iabam iadih bad iathiah lang ha kajuh ka nep ha ka sorkar MDA bad kumta kam nud eiei ban saham tang shi kyntien ruh ia kane ka synshar shi iing ha Meghalaya.

Ha kane ka sorkar MDA, kaba la bah khala, da ka BJP, ki don 5,6 ngut ki MLA na ka iing U Conrad Sangma, nangta sa ka MP, nangta sa ki MDC bad kumta ter ter bad kat ka Garo hills, kaba don 24 ngut ki MLA, ka don 2ngut ki myntri sorkar bad kitei ruh ki dei hi shi para, u myntri rangbah bad sa u hynmen jongu, u myntri Cabinet.
Ym tang katta sha Khasi, Jaintia hills, ki don haduh 3, 4ngut ki MLA na ka iing U Ma Sniawbhalang Dhar bad nangta ki don arngut ki myntri, kiba kynthup ia u pa khynnah bad u khunruid, U Ma Dasakhiat Lamare.

Kumta ki kyntien ka BJP, ki phalang pynban, ba ki dei tang ka jingkren politiks suda bad ba kam don shisha ka jingmut, ban pynduh jait ia ka politiks shi iing, kum ka iing ka Sonia Gandhi, ka iing U MK Stalin, ka iing U Chandrashekhar Rao bad kiwei.
Kam dei tang katta; mynta, ngin ia peit ia ka jubab jong U Conrad Sangma, uba dei u nong ialam jong ka seng NPP, la u sngew iahap ne em, ban dang iatreilang bad ka BJP, haba ka la tynrah ia u na pyllew mat syndon, lyngba kitei ki kyntien, kiba nep har har kum ki namding bad lada jia ba u dei u riewnud, ula dei ban kynjat noh ia katei ka seng na kane ka kynhun sorkar synrop; hynrei, lada um nud ban leh kumta, ka pyni, ba ula dei shisha u riew rhah bor bad u bym salia, wat lada u shah bynthiew ha katei ka seng synshar jong ka India.

Ka BJP, kum ka seng kaba heh tam jong ka Ri, ka la dei ruh, namarkata, ba kan thawlad tyngeh, ban pynduh jait ia katei ka synshar shi iing, da kaba kan ther ia la ka jong ka bor ka buit jongka, ha ka elekshon MLA 2023.