Bha pynban ka result SSLC, haba khang dam

Ka shu mih ka jing pyrkhat, ba kumno ka leit bha ka result ialeh Secondary School Leaving Certificate Examination (SSLC), ha une u snem ba don ka jing khangdam ha ka jylla bad ha ka Ri hi.

Ka result, ba dang shu pynmih da ka MBOSE, ka pyni, ba ki don 52.91 percent kiba pass bad katei ka kiew, na ka 50.31 percent, kaba dei ha u snem ba ladep.

Ki khynnah kim ioh leit skul, ki hap shaniah, ha ki online class, ki hap shaniah ha ki kmie ki kpa, ki hap pule hi dalade bad katno tam ia ki khynnah nongkyndong, ki bym don mobile, ki bym don network, ki bym don internet.

Ym tang katta, ha baroh ki snem, shwa ban ialeh phainal, la ju jied shiah shwa ia kiba bha tam, katba mynta u snem, la shu kit lymmuh lymmain, hynrei, ynda ioh result, kito kiba dei ban long ki soh kyntait, ki kylla long pynban, ki soh kynsai bad ki dei, halor kine kein ki mat, ba ka pyn lyngngoh, halor ka result SSLC.

Shuh shuh, kaba pyn pyrkhat, ka long ba ia ki jinghikai, la ai online, katba ia ka eksamin, ki hap leit thoh sha kamra class bad katei ka pyni ba ki khynnah jong kane ka snem, ki da tbit shisha, ba ka jabieng jong ka online, ka proh (lehse) palat ia ka offline class.
Na ka result, ngi iohi, ba tang ka Garo hills, kaba da hiar tasam ha kane ka sien, ha kaba ka East Garo hills, ka don 35.10 pc, West Garo hills 34.63, South Garo hills 27.50, South West Garo hills 23.10, hynrei ka East Khasi hills, ka don 71.97 percent, ka East Jaintia hills, ka kiew bha, da 85.09 pc, ka West Jaintia hills 73.41pc nalor kiwei pat.

Ka result SSLC 2021, ka dei hi lehse, wat kaba ka MBOSE, kam khmih lynti, ba kan kham kiew, ia kaba long ha u snem ba ladep; hynrei, haba ka kham kiew ha u snem jong ka jingkhang dam, ka dei namarkata ia ka MBOSE, ba kan tih tyllong, ia ka daw bah, ba balei ki khynnah ki kham stad pynban, haba ki don ha iing bad la ki kmie, ban ia kaba ki leit skul bad ki kham pass bun, haba shu phah lymmuh beit, khlem pyn ialeh selection.
Kam dei tang katta, la iohi, ba kiba wan shakhmat, ki kham ia don ruh na ki nong kyndong bad katei ka nang pynpaw, ba ki samla shnong, ki stad dalade hi, katba ki samla sor, ki shaniah beit ha ka leit khreh kot, ha kaba ha u snem ba ladep, kim ioh leit khreh kot satia.