Bat ki bor shnong, ia ka kali U MDC, naba shangmiet

Ka shnong Mawpun Kshaid, ka la pyni, ia la ka jong ka bor jongka, da kaba ka leit khang lynti, ia ka kali jong U MDC ka Umroi, namar ba U MDC, u leit rung sha katei ka shnong, ha ka por 11baje mynmiet, jong ka sngi thohdieng ba ladep.

Kam dei tang katta, hynrei, katei ka jingjia, ka la ijli pynban, ha kaba ka poi, sha ka jing ia kynrup para met, namar ba uwei na ki nongbud jong U MDC, ula pyni bor pynban, ia ki bor shnong, ha ka jaka, ba kan don ka jing iakren, kaba shai para rangbah, hapdeng kitei ki nong shang shnong, ha ka por shiteng synnia.
Ka jingiaroh, ka leit sha ka dorbar shnong bad ka dei ruh, na kane ka daw, ba ka long kaba ma shibun, lada ki Rangbah Shnong, ki don liang bad ki MLA/MDC; namar ba lada ki don liang, kumta kum katei ka jingjia, kan nym jia satia bad kin jin da la buhrieh bad ia sylla, ia ki riewsain pyrthei, ba kin shang miet katba mon.

Ha kine ki sngi, la iohi, ia ki dorbar shnong, ba ki la sdang ban pyni, ia la ka jong ka bor, da kaba ki khang ia ka iaid mon, ki kandidet bad ba kim shah ba kin ia rung bun briew bad nangta, ba ki pynlong ruh ia ki rynsan iatainia jong ki kyrtong bad kitei ki dei ki dak kiba ai mynsiem ia ka synshar paidbah jong ka jylla bad katei ka long, ba lada ki kyrtong elekshon ha US, UK, France, Germany bad kiwei, ki hap ban leit shah kylli jingkylli ha ki kotkhubor, kumta kine kiba hangne, balei ba kim nud ban ieng ha ki rynsan paidbah.
Ka sor Jowai lem bad kiwei ki shnong ha Jaintia hills, ki la sdang ban pyni, ia la ka jong ka iktiar bad katei ka shnong ha Ribhoi ruh, ka la pyni, ia la ka jong ka bor; te haba kumta, balei, ba kim mih, ki dorbar shnong, lane ki Seng bhalang ha Khasi Hills, ba kin khot ia kitei ki rynsan ia sei nia jong ki kyrtong bad katei kan pynsuk ia ki shnong ki thaw, ba kin pynlong, tang kawei ka jing ialang kanbas elekshon bad ba kin nym ia bunkam ki nongshong shnong, ban leit shah shkor, ha ki jing ialang jong baroh ki kyrtong.

Mynta, ba ka sngi thep vote, ka la hajan eh, kumta, ki bor jong ka tnat elekshon, ki dei ban ai ka jing iatreilang bad ki bor shnong bad kan jin da la bha, ban khang sbak, ia ka iaid ka ieng, ka rung ka mih ki briew kiba nabar, hadien ka por 10baje mynmiet.