Ban pynjot te ka suk, ban tei pat kaba eh, ong ka jingrwai

Ha kane ka jingiakhun roster system, lane reservation policy, la hab ban kynmaw ia kawei ka jingrwai hyndai, kaba iaid iew bha, ha kito ki por bad kata ka ong, ban pynjot te ka suk, ban tei pat kaba eh lane ha kawei ka kyntien, ban pynpra ia ka iing, lah ban leh, tang ha ki minit, hynrei ban tei pat ia ka, kan shimpor da ki snem, lane ban pyniap ia u briew, ka shimpor, tang da ki minit, hynrei ban pynheh ia u briew, ka shimpor, da ki phew phew snem.

Kumta hi ka jia, ia ka bhah kam bhah jam jong ka sorkar jylla, ha kaba la dep leh kyrkieh ha u snem 1972 bad ka jingmut ha katei ka por, kam dei satia, ba kan neh, haduh sanphew snem kynthih, hynrei ka thong jongka, ka dei tang na ka bynta shiphew snem; hynrei na kino ma kino ki daw, la shu iehnoh kumto bad kaba kham sniew, ka long, ba nalor ka bhah kam, ka leit tyngkhap lang, sa ha ka bhah pule sha ki kyrdan kiba heh, ba la bei pisa da ka sorkar jylla.

U Bah Paul Lyngdoh, myntri ka sorkar jylla, ula kren shai, halor kane ka mat, da kaba u kynthoh, ba ia kaei kaba la pynjot ha ki 50 snem ba ladep, yn nym lah satia, ban shu syrdep noh, ha ki khyndiat sngi bad katei ka dei ka mat, kaba ki riew shemphang, ki dei ban shai bha bad sngewthuh bad kam dei tang kata, hynrei katei ka mat, ka la leit ha ka elekshon MLA ba ladep, ha kaba ki seng trai ri, kum ka UDP, ka VPP bad kiwei ki la leit rah sha u paidlang ka jylla, hynrei u paidbah, u ia kynrup ia ka pisa bad kyntait ia kitei ki ishu; te ban iakren dierpor kam myntoi satia.

Lada iakren ia ki 50snem ba ladep, kine ki nongialam, kiba mynta, kiba kynthup ia U Bah Prestone Tynsong jong ka NPP, U Bah Paul Lyngdoh jong ka UDP, U bah Metbah Lyngdoh jong ka UDP, U bah Ardent Basaiawmoit jong ka VPP, Bah Ronnie Lyngdoh jong ka Congress, kong Ampareen Lyngdoh, bah Charles Pyngrope, TMC, U Mukul Sangma, Bah AL Hek bad U Conrad Sangma, kim lait satia na ka jingkitkhlieh, namar ba ki la dei ki dkhot jong ka iing, ha ki bun bun snem ba ladep bad lada ki thaw ishu, ha kine ki sngi, ka jubab, kaba suk, ka long “peit shwa ia ka lyngkdong lajong”.

Ka por, ka la dei ia ki 60ngut ki MLA, ba kin pynbeit ia kane kam, hynrei, lada kim sngew mon, kin ailad noh ia ka kashari, ba kan leh katba ka mon, namar ba katei kam dei hi ruh ka ain, hynrei, ka dei tang ka jingpynbna jong ka sorkar bad ynda la poi sha Supreme Court, hangta ki kyndeh jabieng, kin sa pyngngad artad kdar.