Ban kem nongtuh, nongpyniap briew, hap ai hukum u myntri?

Ka jinglong jingman ka synshar khadar, ha kane ka jylla rit jong ka thain shatei lam mihngi, ka long kaba sngew shutia tasam, haba peit pyrman narud bad kata ka long, ba u symbud myntri rangbah, uba peit ia ka tnat pulit, u hap ban ai jingbthah ma u, ban leit kem ia ka kynhun LRO, kaba dei ka kynhun pynshit niam, lane kaba kren bein ia ka KSU bad kumjuh kaba kren pyrshah ia ki riewngeit kristan ha ka jylla.

Ka ejahar, ka la don tyngkrein bad kum ia katei ka kynhun, kaba la pynjyrsih, ia ka imlang sahlang bad ka nam ka burom jong ka seng ki samla pule bad nangta ia ki balang Khristan; kaba lyngngoh pat, ka long, ba kumno ki pulit, kim leh stet, ia la ka jong ka kam bad lada jia, ba kum ia katei ka kam, ka da dei ban bthah da u myntri kam poh iing; kumta, lashai ia ki kam tuh, ki kam pyniap briew, ki kam khynra droks, ki kam khaii tuh masi, kit tuh dewiong beain; yn hap ban ap, da ka hukum jong u myntri kam poh iing?

Kat haduh mynta, ngi dang iai kynmaw ia uwei u snar pynshit jaitbynriew, U Vickey Dey, u bym pat ju shah kem satia ha ki pulit ka jylla bad mynta ka kynti ruh, ka long kaba eh ban shu ia kren antad, ba ioh lehse, un dei hi une, u snar duh jong katei ka seng ki riew pynshit, ka LRO?

Mynta, haba kat u myntri ka tnat poh iing, ula pynmih hukum, ka la dei namarkata, ia ki pulit, ba kin pynher stet noh ia ka kam jongki bad ban leit khynra ia ki jaka sah jong kitei ki riew pynshit jaitbynriew bad kam dei tang katta (imat) ka la donkam ruh ia u myntri kam poh iing, ba un hukum noh ia ki pulit, ba kin leit wad sa ia U Vickey Dey bad lada jia ba ki ioh, sa ia utei, kan jin da la long, kumba ioh khlong syndon ia u shiah, na ka jaka ba at bad ba kan sa mih lut ka ksuit shisien mih.

Ban wad ia kitei ki ehrang LRO, kam dei kaba eh, namar ki don la ki jong ki social media group jongki bad kam dei tang katta, ki da byrthen ruh, ba kito kiba leit pynkulmar ha Mahadev Khola, kin shah kem, tang mar ia hiar ha Assam bad ki pulit ka jylla, ki la dei ban wad jingtip, na ki pulit Assam, ia ka ktem jong kitei ki kynhun pynshit.

Kam dei tang katta, hynrei, ngi iohi ia shibun bah, ki jingshah nion bein jong ki para ri jongngi sha Khanduli, sha Mukroh bad sha ki bynta jong ka Ribhoi bad kan jin da la bha, ia u symbud myntri rangbah, ba un ai hukum lem ia ki pulit jong ka jylla, ba kin leit thwet ia kitei ruh ki riew pyntriem sha kitei ki thain khappud; namar ba kat haduh mynta, ngi iohi, kumba ki iai mih ki jingleh hangamei bad leh trai khlieh da ki riew pyntriem, ba har rukom, katba uwei ruh, um don pat uba shah kem.