Bamsap ka sorkar NPP

Ka la don ka jingshah kynnoh jong kane ka sorkar Meghalaya Democratic Alliance (MDA), ba ka donkti ha shibun bah ki kam bamsap bad ia katei ka ishu, la dep lam khmat, naduh kham mynshwa da ka seng UDP, ha kaba ka dei lyngba ka jing dawa jong katei ka seng, ba la weng noh ia U James K Sangma, kum u myntri kam poh iing ka sorkar jylla, ha u rymphang jong u snem ba ladep.

Hadien kata, ka la ioh lynti sa ka BJP, kaba la phalup bad ka mon bad ka diang, ia ka jing bamsap jong kane ka sorkar bad ka da thew khnang hi ruh, ia ki tnat ba la pyniaid da ka seng NPP, kum ha Garo bad Jaintia District Council.
Ha kane ka kynti, haba la mih ka jingshah phalup na la iing bad kata ruh, na ka khun khadduh lajong (ka UDP), kumta ka pyni shai ba kane ka sorkar NPP, ka donkti shisha ha ki kam bamsap, kiba bun phew skit, khamtam, ha ka tnat ba la khlieh da U James K Sangma, ka tnat bor ding.

Ka UDP, ka la dawa, ba U James, u dei ban hiar shuki mardor na ka tnat bor ding bad kumta, ngin dang ia peit, ia kaei kaba U Conrad K Sangma, un leh ia la u jong u hynmen, ha kane ka kynti; hynrei, na kaei kaba paw shai, la iohi, ba haba ka dawa, ka khun khadduh U Sangma, u hap ban pyndem ialade, kumba ka la jia myn shem snem.
Hangne, ka wan ka mat, ia ka jing bamsap jong kane ka sorkar MDA, namar ba kam dei shuh tang ka Congress, ne ki sengbhalang; hynrei, la iohi, ba kiba don lang ha kajuh ka iing, kum ka BJP, UDP, ki la sei shabar ia ka jingtuh jong kane ka sorkar bad khamtam ha ka tnat, kaba la bat da ki Sangma shi para.

Ngin dang ia peit, ia kaei ka ban jia ha ki sngi, ki ban sa wan bad la u myntri rangbah, un hap kohnguh ne em, ia ka jingkwah jong ka khun khadduh jongu, ka UDP; hynrei, lada u sngap ia ka jing kwah ka khadduh, u dei ruh ban sngap ia ka jingkwah ka BJP bad kata ka long ba u myntri kam poh iing, u dei ban hiar shuki, halor ka bamsap kit dewiong ki trok bad nangta, sa ka jing iap ki nongbylla tih dewiong, ha ki khyndiat sngi ba ladep.

Haba shu peit, ngi iohi, ba u myntri rangbah, u pynshlur ruh, ia ka jingshim ram na ki Bank ba shabar ri, naduh ka shna surok, sam bor ding, shna skul, ring um slap bad kiwei; hynrei kaba ima, ka long ba kitei ki ram, kin sa pynlong mraw ia u paidlang ka jylla, da kaba kin tangon da ki khajna bapher, naduh na surok bad nangta ha kiwei pat ki jingtrei ki riew paidbah.