Balei U Syiem Mylliem, u sngap jar jar?

Ka jing ia kawang ktieh, ka la nang jur ha kine ki sngi, halor ka ishu them Iew Mawlong, lane ka ishu Them metor bad kata ka dei, ba ka sorkar jylla, ka thmu ban kynriah noh ia ki khar metor, na katei ka jaka, katba ki khar metor, ki pyneh hi triang bad ki kam, ba katei ka dei ka jaka, kaba la ai sngewbha da U Pa’iem Latho Manik Syiem, U Syiem jong ka Hima Mylliem ha u snem 2008.

Ka kyrteng jong utei U Syiem, ka la paw nam, ha kylleng ka Ri India, ha kine ki sngi, khamtam ha ki kynhun Sikh bad ki nongialam sorkar ha Punjab, ha kaba ki iai pynksan ia ka jing ioh kam trai jongki, ia katei ka jaka, ka dei lyngba ka jingai mon sngewbha jong utei u khlieh ka Hima Mylliem.

Kaba lyngngoh, ka long ba ha kat kane ka jing ia kawang ktieh, kaba la pyn sniew dur, ia ka jingsngew ki khun jong ka Hima Mylliem bad ia ka jingsngew u khun khasi khara; hynrei U Pa’iem Latho Manik Syiem, um shym la kren satia tang shi kyntien ruh bad kata ka long, la ula ai shisha ne em ia katei ka jaka bad lada ula ai, u ai kaba heh katno bad nangta, la u shu ai wai ne u die duh, ne u shu ai sngewbha bad nangta, lada ula ai, ula bud ne em, ia ki kyndon ka jingdie bad jingthied khyndew ka sorkar jylla, lane ka land transfer act bad kiwei de ki kyndon?

Ka jing shu sngap jong utei U Syiem, ka pynmih ia shibun ka jing suba sniew jong uba bun balang bad ka jing sah dum sah lyngngoh ruh, namar haduh mynta, kiba tip ia ka jing shisha, kin dei beit tang ka sorkar Jylla, ka District Council bad kitei ki khar metor.
Kam dei tang katta, haba ka jia, kum kane ka kynrum kynram, ka la dei ruh ia U Acting Syiem, ba mynta, ba un lum un lang ia ka dorbar Hima, ban iakren ia kane ka mat bad ban iashai ha khmat jong u paidlang jong ka Hima Mylliem, halor katei ka jing die duh ia katei ka jaka, da utei U Syiem barim jong ka Hima.

Ka jingjia ia ka them Iew Mawlong, ka la wan rah ia ka jing duh jing shaniah jong u paid Khasi, ia ka jing trei kam jong U Syiem ka Hima bad ka nang pyn shisha ruh pleng, ia ka jing kynnoh na ka por sha ka por, ba U Syiem jong ka Hima Mylliem, ha ka jaka, ba un iada ia ki jaka puta, hynrei u lilam noh pynban sha ki bar jylla, ban myntoi shimet ialade.