Balei ngim pynmih IAS ha ka jylla?

U kyrtong jong ka seng NPP na North Shillong, ula rah ia ka mat, kaba donkam bad kaba kongsan bha, ha kaba u buh ia ka jingkylli, ba balei, ngim lah ban pynmih IAS, ha ka jylla, hadien jong u snem 2013.

Katei ka long ka jingkylli, kaba ktah ia ka pyllew mat jong uwei pa uwei u nongshong shnong, namar ba ngi la hiar ka jingnang jingstad ne ka pule puthi jongngi, mynta la 10snem kynthih, ha kaba ngim lah satia ban sei, wat tang uwei ruh u ophisar ba la ithuh da ka sorkar India, ha ka kyrdan IAS ne IPS.

Ka sain pyrthei, ka la jaboh tasam ha kane ka jylla, ha kaba ki heh spah, ki la ioh rung khlieh bad kitei ki pynkylla kam khaii lut nadong shadong ia ka roi ka par, ka synshar khadar bad baroh jait ki kam ki duk jong ka sorkar bad kine ki jait briew, ki beh thong, tang ha ki kam theh pisa ha ki surok, ha ki jingkieng, ha ki iing dorbar, ha ki lynti iaid kjat, ha ki jingtei ophis, na ka bynta ba kin shna pisa ialade; katba ka jingthmu ban tei ia ki skul kiba biang, ki nonghikai kiba biang, ki hospital kiba biang, ki lad ai kam kiba biang kam don satia bad ka dei kane kein, kaba u kyrtong jong ka NPP, ba un sngewthuh ba kim mih satia ki ophisar na la ka jylla, namar ba ki nongialam jongngi, ki la shah thied ka jabieng jongki, ha ki ophisar kiba nabar.

Kam dei tang katta, haba ngi ioh ia ki nongialam sorkar, kiba iabeh thong tang ia ka pisa, ngi iohi ruh, ba ki mat jingdawa jong ka jaitbynriew, kim iaid kam satia haei haei ruh, namar ba haba ki leit Delhi, ki leit ban shu rah bowl, ym ban dawa ia ki hok, kiba ka jylla, ka dei ban ioh.

Kumba la kren haneng; ka jing shisha, ka long ba ia kitei ki samla kiba tbit, yn nym lah ban sei ha ka shisngi, hynrei, ki dei ban duriap da ki phew phew snem bad ki dei ban don namarkata ki skul kiba bha, na ka bynta jongki; hynrei kat haduh mynta, wat ha Shillong, ngim pat don ia ki skul kiba tbit ban ialam lynti ia ki samla jongngi sha ki kyrdan kiba halor, lait noh na ki skul jong ki balang Khristan.
Ka sorkar jylla, ka la sdang ban ai bai bam ia ki samla kiba thmu ia katei ka eksamin, lane ban iateh lok bad kito kiba ju ai jinghikai, ia kitei ki eksamin; hynrei, katei ka dei ka jingleh tangdep bad lada ka dei shisha ban shut jabieng, ia ki samla jongngi, ngi donkam ia ki skul kiba pawnam bad ha kitei ki skul, yn ai jinghikai kyrpang ia kito ki khraw jabieng bad nangtei, yn lah ban phrang bha ia ki, ba kin leit sha ki kyrdan doktor, ki ophisar kiba heh jong ka jylla bad jong ka sorkar India ruh kumjuh.