Balei kynran dien ka Dima Hasao?

Hadien 4snem tam ne duna, ka Dima Hasao, ka la kynran dien noh ialade, na ka jingialeh mukotduma, halor ka kam khang dewiong ha Ri Khasi Jaintia.

Katei ka jingleh, ka pyni, ba katei ka seng, kam don ia ka jingmut kaba beit ban iakhun haduh kaba kut, halor ka kam khang dewiong, hynrei ka shu thew pleng, tang ban sniew ia ka kamai kajih jong ki trai par bad lait nangta, kam salia satia ia ka sniew ka bha kaba hadien jong katei ka kam.
Mynta haba u paidlang ka Ri Khasi Jaintia, u don ha ka jing kutlad kaba khraw, ula bun uba duh ja, na ka jingsniew ka trei dewiong, ula bun uba im kordit na katei ka daw, katei ka seng, ka la sngewhun hi jrut bad kam kwah shuh ban hikai ia ka NGT lane ia ka Supreme Court, ha kano ka dur, ba kin iaid shakhmat halor katei ka kam kaba dang sah shakhmat.

Kam kut tang katta, hynrei ngi iohi shuh shuh ba ka Dima Hasao, kaba iakhun ban khanglad ia ka jingtih dewiong beain ha Ri Khasi Jaintia, hynrei kam shym la leh eiei satia, na ka bynta ban khanglad ia ka jingkit dewiong beain sha Assam bad katei ka pyni, ba kaba leh ha Ri Khasi, ka dei kaba sniew suda, katba kaba leh pat ha Assam, kaba bha suda.

Ym tang katta, hynrei la iohi shuh ba wat ki pulit Meghalaya lane ki bor tnat mar poh khyndew, ba ki buh ia ki kyndon kiba tyngeh naduh na Jaintia Hills, haduh ha Khanapara, hynrei ki trok ki iaid sahuh, mar ia lait na Jorabat ban leit pynhap mar sha Beltola bad katei ka dei ka kam kynshoit kaba palat liam, ha kaba la pynshlur ia ki nongkhaii tuh, ba kin iaid sha Assam, namar ki nong dawa, ki don byllai bad ba ha khmat jongki, kam don satia ka jingleh beain.

Lada ka dei ban khein beain ia ka jingtih dewiong na Jaintia Hills, ka la dei namarkata ia ka sorkar Jylla, ba kan pyrkhing, ym tang ia ka jingtih, hynrei haduh ka jingkit bad ka jingleit pynhap mar, lada ka dei sha Assam lane sha West Bengal lane ter ter, ha kaba ka dei ban iawer ia ki sorkar Jylla, kiba don marjan ba kin iatreilang halor katei ka jingkhang tih dewiong beain jong ka Meghalaya.

Hynrei haduh mynta, kam don satia kaba kum katei ka jing iakren bad la iohi, ba katba nang thaw ia ki ain kiba pyrkhing ha Meghalaya, hyrnei ka nang muja ka Assam bad katei kam iahap satia bad ka pyni pynban, ba ka dei tang ka buit ban pyndik ia kiba kit mar ha Ri Khasi.