Ka elekshon MLA, ka dang shu kut shen bad la iohi, ia ki ishu ieid jaitbynriew, ba ki la sdang ban khie im biang ha kine ki sngi, ha ki rynsan social media, kiba kynthup ia ka roster system lane ka bhah kam bhah jam kyrpang, ia ki trai jylla.
La iohi ruh, ia ki riew paidbah bad ki seng bapher, kiba sdang ban ai jingiaroh ia ka lynti iaid jong ka VPP, halor katei ka mat, da kaba ka leit rah ha iing dorbar jylla.
Hynrei ka bynta ba kongsan eh, ka long ba ki ishu ieid jaitbynriew ki khie im, tang ynda la kut elekshon; hynrei balei te, ba kim shym la khie im, ha shwa ban long ka jing ia thep vote lane balei ba kane ka ishu jaitbynriew, kam lah satia ban pynkylla sha ki vote jong kito kiba kren halor kitei ki mat?
Don kiba kwah ia ka sorkar seng trai ri; hynrei, kumno yn lah ban thaw sorkar seng trai ri, haba ka UDP ka jop 11ngut, ka HSPDP 2 ngut, ka PDF 2ngut bad sa ka seng thymmai VPP 4ngut bad kumno sha, yn thaw sorkar, haba tang 19ngut ki MLA bad hangta ruh, ka mih ka jingkynnoh ia ka jingshet jaitbynriew jong ki seng trai ri, khamtam ia ka UDP bad hangne ruh, ka wan ka mat, ba lada iatrei lang bad ka Congress, TMC, kin ong, ba ka ieid jaitbynriew, hynrei, lada bad ka BJP, NPP, kin ong ba isih jaitbynriew.
Ka iing dorbar, kam dei eh, tang ka kam ban ia rung ia mih dorbar, ban ia halla ban ia kyrkait, hynrei ki liang pyrshah, ki don ia kajuh ka jingkitkhlieh, kumba don ki liang synshar bad kata ka long ban thaw ia ki ain, kiba myntoi ia ka jylla bad ban wan rah ia ka roi ka par sha ki Constituency jongki.
Ka nuksa kaba shai bad kaba shynna bha, kaba ngin iakren, ka long ba ka sorkar India, ka la khlain bor shikatdei ha kine ki sngi, ha kaba kam salia satia ban pynduh ia ka ain jinglong kyrpang ki nong Kashmir, kam salia satia ban pynduh ia ka jinglong MP U Rahul Gandhi, kam sngap satia ia ka jingdawa ka jylla ia ka ILP lane kam shah shkor ia ka jingdawa ia ka ktien Khasi, kam peit bniah satia ia ka ishu jong u pud u sam jong ka Meghalaya bad ka Assam bad phim lah ban leit shong thad sngi ialade ha Motphran, ban dawa ban pynlong ain ia ki, hynrei, ka donkam ka jingiakren kaba shai bad ka sorkar India.
U Conrad Sangma ruh, mynta ula khlain bor tyngeh, da ka jingjop kput jongu na Garo hills bad kumta lada phi leit lynthaw ia ki microphone, ka iing dorbar ruh, kan nym mih soh eiei satia; hynrei ka dei tang ka jingiakren bad ia sngewthuh jingmut halor ki ishu bapher.
ha ki office sorkar mynta don bun shah ki khasi-jaintia ban ia kiwei ki jaitbynriew. Bamih ka jingia kren ha assembly, lyngba ka PIL mih bluit ka roster system ban pyntrekam janai iaka policy. Lyngba kane ka roster system, hadien habud, ki khasi jaintia kin don noh tang 40% bad kiwei kin don 60%. Nang duhnong shuh shuh u khasi-jaintia daka jing mushlia iaka policy ha assembly.
Ka jing eh kalong balah bun palat ki party riewlum khasi bad ymdon kawei ka party ba nud ban ai ki jingkular (manifesto)shwa ka election kum ka reservation policy, ILP, etc. Dei ka jinglong jingman Jong ka politiks baki paidbah ki kham pyrkhat iaki jing myntoi haki constituency ban iaka jaitbynriew. Te kumjuh ruh,. ki politician haka por election ki kular banleh lut na bynta ka ri bad jait bynriew hynrei dalah ioh shong haka Liang synshar ki set kyllut ki shkor bad tap matlah ki khmat. Thok man ka San snem,biej man ka San snem bad khroh man ka San snem