Balei, ki bun kiba iap ha iing?

Ha kane ka jing lynshop jong ka khlam corona, la iohi ha kine ki sngi, sa kawei pat ka jingjia bad kata ka long, ba ki don bun kiba iap ha iing bad kata ruh, ba ki ioh ia ka jingpang khlam corona virus.

Ka long ka jing sngewkhia kaba jur, halor ka jingiap jong ki phew ngut ki briew, ha la iing, ha kaba tang ha ka sngi hat majai, na ki 19ngut kiba iap, ki don 8ngut kiba iap ha iing bad kam dei tang katta, hynrei kine ki 8ngut, ki dei pynban ruh kiba ioh pang ia ka khlam covid.
Kam kut tang katta, kaba kham sngew lyngngoh, ka long, ba wat la ka don ka skhim MHIS bad wat la ki shong ki sah, ha syndah jong ki hospital, hynrei kiba bun kiba sah ha Jaiaw, Mawprem bad ha kiwei ki jaka sor, kim treh satia ban leit shah sumar sha ki hospital bad katei ka dei ka mat, kaba pyn pyrkhat, ba balei ki nongsor ruh, kim kwah leit sha ki hospital bad ki hun, wat lada ka dei, haduh ba kin da iap ha iing ruh?

Ka dei ban don ka daw bad kata ka long (i) ioh lehse, ki hospital, kim don jaka shuh ban sumar briew ha kine ki sngi (ii) ioh lehse, ka la rem palat ka bai sah ha ki hospital (namar la ju iathuh, ba tang shu rung hospital, lada ym don pisa, da ki lak kam pat long) bad (iii) ioh lehse, la shu suba pang corona, kat ia kiba leit shah sumar.
La kren ha kane ka peij, ha ki khyndiat sngi, ba ladep, ba ki la dei ban don ki hospital, ki ban sumar kyrpang ia ki jingpang paidbah bad ha kum kane ka por jong ka khlam, ka sorkar jylla, ka lah ban shim ia ki hospital jong ki riew shimet, lane ka lah ban plie ia ki CHC bad ki PHC ba kyrpang, ki ban sumar ia kitei ki jingpang, ba kin nym ia khleh ha kajuh ka jaka bad kito kiba don jingpang covid.

Ngi im ha kine ki sngi kiba eh bad ngi donkam ia ki rai, kiba peit ia ka bha ka miat jong u duk u rangli bad wat u lak u putit, namar ba ha ka jingpang, ka jingdon spah jongphi, ka kylla um lut khoit bad ka sorkar jylla, kam donkam ban shu ang tang ka ktien, hynrei ban nym lehrain, ban shim ia ki rai kiba dei ban shim bad kaba hap ban wad jingshai noh, ka long, ba lada kiba don ha sor, ki la ngiah ia ki hospital, kumta katno tam, ia ki nong kyndong lei lei?

Kam kut tang katta, hynrei, lada ki 8ngut kiba iap ha iing, ha ka sngi ba ar, ki ioh corona, ynda la dep test, kumta (lehse), kin don bun bah, sa kiwei ruh, kiba iap ha la iing bad kiba ioh ia katei ka khlam lane ngi lah ban ong, ba ka khlam, ka la sar naphang, ban ia kaba ka sorkar, ka dang mutdur.