Balei ka elekshon 23, ka kynjah tasam?

Ka elekshon, ka la hajan eh, ha kaba ka jingthep vote, kan long sa tang 9 bnai lane 270sngi antad bad ha ki elekshon, kiba la dep, la shongshit ka iaid ka ieng, ka leit ka wan jong ki kandidet lem bad ki seng sain pyrthei bapher.

Kaba pynlyngngoh, ba ha kat kane ka juk jong ka social media, hynrei, ka iaid ka ieng, ka kynjah slam slam bad katei ka lah ban don ar tylli ki daw (i) ba ka la jubor ka hiran, na ka khlam kaba la lynshop la ar snem tam lane (ii) ki paidbah, ki la ngiah elekshon.

Ha ki sien ba ladep, la iohi ia ka jing iarung ia mih parti ki paidbah bad ki jingialang kiba heh ba heh ban pdiang burom bad nangta sa ki kandidet, ki ban ialeh, na ki Constituency bapher ha kaba ka la mih ka jing iakren ia uba kham khlain bad uba kham tlot; hynrei ha kane ka kynti, ka iaid sangem pynban bad ym shym la bna satia wat ia ki kandidet ruh.
Kine ki jingjia, ha kine ki sngi, ki la dei ban pyn pyrkhat ia ki pyrman sain pyrthei, ba u paidbah (lehse) ula jlep pynban, ia kane ka kam bam mon, dih mon; tang ha ka shibnai arbnai bad sa sohsat, da ki kam jaboh suda, ha ki sansnem kynthih.

Ki la don ki khep, kiba ki kotkhubor ha England, ki thoh, ba ki samla jong katei ka Ri, kim ju tip, tang ia ka kyrteng jong u myntri rangbahduh bad lada ka long ha kane ka dur, kan pyni, ba ki samla jong ka jylla, kin nym kwah shuh ban don bynta ha ka sain hima, synshar khadar, namar ba ki la mad ba kam don jingmut eiei ruh em bad ha kaba kum kata ka por, ngin sa iohi, ba ki ban rung, sha kane ka kam, kin dei tang ki riewkai suda.
Niuma, lada ka jingmih niang kynjah, kan dang iai bteng ha ki khyndiat bnai ban sa wan, kumta kan lah ban dei ka kabu ksiar ruh, ia ki kyrtong kiba dang mih thymmai, ba kin ioh khyrwait, da kaba suk, ia ki riew rim, namar kan nym ktah eh ruh, ia ka jinglutphut, ha ka leit ka wan, ka jing ia kiew ia hiar kali, ka jing ia leit beh briew sha ki shnong ki thaw bad ioh lehse, kan plie lad pynban, ia ka jing iakren, halor ki ishu ba ktah ia ka Ri bad ka jaitbynriew ha ki sngi ki ban wan.

Ha kane ka lyer daitthah, ka lah ruh ban jia shisha, kumba ong U Mukul Sangma, u dkhot barim duh ka iing dorbar, ba kin sa bun na ki MLA, kiba mynta, ki ban sa liem lyndang ha u 2023.