Balei bym sei, da ki kyrtong ionglang ka MDA?

Ka elekshon, ka la poi noh artad bad ki kyrtong elekshon, ki la ia khreh ia khrum, ban mih sha ki paidbah, ha la ki jong ki jong ki madan ba ki thmu.

Hynrei hangne, ka wan ka mat, kaba donkam bha, ia ki seng sain pyrthei, ba kin pyrkhat bad khamtam ia ki paidbah ruh, ba kin shong duriap bha, ha shwa ba kan dei ka por thep vote bad kata ka long, ba ka kynhun synrop jong ka BJP,NPP; ka donkam mynta ia 30ngut ki MLA, ba kin ioh ban thaw sorkar biang ha u 2023 bad ha katei ka jingkhein, ka donkam ia U Conrad Sangma, ba un jop biang na Tura, U bah Prestone Tynsong, ba un jop biang na Pyn ursla, U bah Metbah Lyngdoh na Mairang bad kumta ter ter bad ka la dei ia ki nongialam jong kane ka sorkar MDA, ba kin nym buh kandidet pyrshah ia U Conrad na Tura, ia U Bah Metbah na Mairang, ba kan wan biang ka sorkar, kaba ki la mutdur halade.

Hynrei kaba pyn lyngngoh, ka long ba kumno sha kein, ka BJP, kan leit buh ia U Bernard Marak, ba un ialeh pyrshah ia U Conrad Sangma, myntri rangbah ka Jylla (namar lada u rem, mano shuh ban ialam ia ka sorkar) bad kane ka jait jingleh, ka paw shynna, ba kine ki nongialam jong ka sorkar synrop, ba ki da stad shisha, ba ki pyn ia shoh, ki pyn ia troh, ki pyn ia lympat ia u paidbah ha madan, katba ialade pat ki ia khroh, ki ia kdup bad ki ia kjup ha kajuh ka pliang ja jong ka sorkar synrop.

Kane ka jait jingleh, ka long kaba ijli tasam, ha kaba u paidlang ka jylla, ula dei ban long uba stad bad uba peiphang shi katdei bad ba u dei ban iaid lang noh, da ka mynsiem ia synrop, khamtam ha kitei ki Constituency, ba ki don ki nongialam ba ha khlieh jong kane ka sorkar bad kata ka long ba kin thaw lem ia ka kynhun MDA, ha Tura, ha Pynursla, ha Mairang bad ha kiwei de ki jaka, da kaba ailad ia ka NPP ha Tura, ka UDP ha Mairang nalor kiwei ki jaka.
Ka la dei ia u paidlang ka jylla, ba un tip shai, ia ka buit iatreilang jong ka BJP lane ka kynhun NDA, kaba ki pyniaid na Delhi lane ka Congress ne ka UPA bad kitei kim ju iatreilang tang ha Parliament, hynrei ki ia sam madan, wat ha ki Constituency ruh bad katei ka dei ka dak jong ka jing iatreilang.