Balei ba ka KHADC, kan khot hajir ia ki Syiem?

Ka Khasi District Council, ka la khot hajir ia U Syiem ka Raid Marwet bad ia U Syiem ka Hima Nongspung, namar ba ki jingtei kiba radbah, ki la nang mih ha ki khappud jong ka Assam bad ka Meghalaya, kiba don ha ka jingpeit jong kitei ki ar ngut ki Syiem.

Hynrei, ka jing kylli, ka long, la kitei ki Syiem, kin leh aiu te, haba ka sorkar Jylla, ka la dep ia pynbeit bad ka Assam (la bun phew snem mynshwa), ba ki kam pynroi, ki dei ban iaid beit sha ki khappud bad la iohi ruh ba ka jing iakynduh U DC ka Jowai bad U DC ka Haflong, ha ki khyndiat sngi ba ladep, ba ki kren hi ia ki kam pynroi, ba ym dei ba khanglad sha ki khappud.

Kam dei tang katta, ka jingkhot hajir ia ki Syiem, ynda haba la dep tei ia ka jingkieng, lane ia ka paki dulan, ka dang don jingmut aiu te bad ka pyni pleng ba ki khmat bad ki shkor jong ka District Council, ki shim por da ki snem ban iohi bad ban iohsngew ia ki jing thombor ka Assam sha ki khappud bad kam dei tang katta, hynrei ka long shuh shuh, ba lada ka sorkar Jylla, kaba don ki pulit kieng suloi bad nangta sa ka District Council, kaba don ki pulit kiba khlem tiar, kim lah ban iada lane ban synran ia la ki jaka puta, kumta kumno ngin khmih lynti ba ki Syiem, kiba da ki kti kiba thylli kin iada ia la ka it ka hima.

Ki Syiem, ki la pheil ia la ka jong ka kamram bad ka daw, ka long ba ki iohi pyllein pyllein, halor ki kam thombor jong ka Assam, hynrei kim nud ban ialeh pyrshah bad ki phet rieh pynban ialade bad katba ka Assam, ka nang knieh jubor, ia la ki jaka puta, ki Syiem, ki tap daki mask ialade bad kim kwah ban tip, ia kaei kaba jia sha ki khappud.

Mynta haba ka jingkieng ha Balakhawa jong ka Hima Nongspung bad nangta sa ka iing lai mala ha Khanapara, ka la jan dep, kumta kaei ba phin iakren bad ngim tip, la ka sorkar Jylla, ruh ka lah ne em ban pynpra ia kitei ki iing bad katei kam dei ka kam kaba suk, namar ba ym don mano mano ruh ban thaw iing ha jaka jong kiwei bad kaba ma ka long, ba ioh lehse ki trai jaka, lane ki myntri lane ki Syiem, ki la dep lilam ia la ki jong ki jaka bad kumta, katba ki puh shilum, ki nang khynra ia ki lummaw, ma ki pat ki nang bunkam ban niew tyngka pliah.

Ki jing shisha imat, ki kdew, ba katba ka Mizoram, ka nang ngiat shathie ia ka Assam, ka Assam ruh, kan nang ngiat shuh shuh kham shathie ia ka Meghalaya!!