5ngut kiba iap, dei ki nong Assam ne Meghalaya?

Ka jing ia kajia kam pud hapdeng ka Assam bad ka Meghalaya, ka la iai jyrwit haduh ha kine ki sngi, wat haba kitei ki ar tylli ki jylla, ki la sdang ia ka jing iakren jongki la jan arsnem mynta; hynrei kaba pyn sngewkhia ia ka jaitbynriew Khasi, ka long, ia ka jingjia ha Mukroh, ha kaba ki 5ngut ki nongshong shnong ba lui lui, ki la shu iap ei, ha ka step jong ka 22tarik Naiwieng 2022 bad ka daw, ka long ba ka jingbishar hok, halor ka jingshah siat iap jongki, kam shym la sdang satia, kat haduh ha kine ki sngi ruh.

Ka jingdkoh jong katei ka kam, ka long ba ki pulit jong ka Meghalaya, kim shym la nud satia, ban leit kem ia ki nong pyniap briew, kiba dei ki pulit Assam bad katei ka dei ka jingtlot kaba la jubor palat jong U Conrad Sangma, myntri rangbah lem bad u myntri kam poh iing, Ma Lahkmen Rymbui, ha katei ka por bad kam dei tang kata, ha ka jaka, ban leit kem ia ki nongsiat iap, la iohi, ba U Himanta bad U Conrad Sangma, ki ia hiar sha Delhi, ban leit dawa ia ka jingtohkit da ka CBI, halor katei ka jingjia.

Katei ka jingtohkit, kam shym la sdang satia haduh ha kine ki sngi, hynrei, kaba pynmong mynsiem ia u paidlang ka Ri Khasi, ka long, ba mynta lei ka Assam, ka leit kam trai noh ia ka Mukroh bad haba ka long kumta, ka pyni, ba ia ka jingtohkit halor katei ka kam pyniap briew, kam dei shuh ha ka Meghalaya, hynrei, kan hap ha ki pulit jong ka Assam.
Ngi la dep duh ia 19 square kilometre, ka jaka jongngi sha ka Assam, ha kane ka jing ia pynbeit pud jong U Conrad Sangma bad U Himanta Sarma bad nangta, U symbud myntri rangbah, ula nang pynskhem shuh ia ka jingkam jong ka Assam, da kaba ong, ba ki 22 tylli ki shnong kiba hap ha Block I, ki dei kiba ha Assam bad mynta, sa U Himanta Sarma, u leit kam syndon ia ka shnong, kaba lait na u pud jong ka Block I bad Block II ruh bad lada ka long kumtei, ka pyni, ba ka Assam, kam khein burom shuh ia ka Meghalaya bad kan sa kam trai ha ki sngi, ban sa wan ia ka Jowai bad ka Nongstoin lane ia ka Byrnihat ruh kumjuh.

Mynta ka sorkar jylla, ka la rai ban bteng ia ka jing ia pynbeit pud ha ka kylla kaba ar bad ka Assam; hynrei ka jing ia kynad, ka dang don ha ka bynta kaba nyngkong ruh, namar ba ka don ka mukotduma ha Supreme Court hapdeng ki Syiem, ki Sirdar pyrshah ia ka sorkar jylla bad lada U Himanta, ula kam trai lypa shaduh sha Mukroh, kumta, kan dang donkam aiu shuh ban iakren pynbeit, namar ba katei ka pyni, ba ki jaka ia kajia jong ka Block I bad Block II, ki la dei lypa noh sha ka jylla Assam bad mynta, kaba i syier shibun eh, ka long ba hap iehnoh ia kiwei ki shnong bad hap ia wad map, ban kam trai sa ia ka Mukroh.