50 snem ka jylla rilum

Ka jylla rilum, ka la dap 50 snem ka rta, ha ka 21tarik Kylla lyngkot, 2022 bad ka jing ai nguh let, ka leit sha ki nong ialeh ia ka jylla rilum, lada dei ki shynrang, ki kynthei, ki Khasi, ki Garo lane kino kino kiwei pat kiba don bynta lang; bad ka jing ai khublei sngewnguh, ka leit sha kito kiba dang im, dang eh, dang shait ka met ka phad lane ka jing kynmaw ieid ia kito ruh; kiba la khlad noh na sla pyrthei.

Sngewkmen ban pyrkhat, ba ki nong ialam jong kito ki por, ki iakhih bad ki lah ban pynurlong ia ka jing dawa, kaba kat ka jylla bad kata ruh, ha kum kito ki por, jong ka jing ia tan tyllai kaba jur bha hapdeng ka India bad ka thain shatei lam mihngi bad katei ka pyni, ia ka jing shynrain ka sorkar India, ia ka main rangbah jong ki nongialam ka jylla, khamtam ia ki nongialam Khasi Pnar.

Kito ki por, ki la leit noh imat bad mynta, ki sengbhalang, ki la mih kum ki tit, ki seng sain pyrthei ruh, ki la lang kum ki tit, ki politician ruh, ki la rben kum ki tit, hynrei ngi iohi, ba tang kawei ka jing dawa, kaba shi damli saw, ruh, ym lah satia ban pynurlong.

Kaei ka ishu kaba rit duh, kaba ngin kam, ba ngi la lah ban pynurlong, hadien jong ka jing pynioh ia ka jylla rilum bad kawei ka kyntien, kaba kongsan duh, ka dei kaba ki ong jylla rilum, hynrei ha kine ki sngi, ngi iohi, ba ka jylla rilum, ka la kylla jylla ri thor lane ha kawei ka kyntien, la iohi, ba u bym ialeh jylla rilum, ula kamai spah shi katdei, na kane ka jylla jong U Khasi, Jaintia, Garo.

Ki jingshisha, ki kdew ha kine ki sngi, ba ka Garo hills, ka la nang ngam, ha kiba nabar; ki bynta jong ka Shillong, kum ka Laban, Jhalupara, Pynthor, Umpling bad kiwei ki jaka bad nangta sa ki khappud bad ka Bangladesh, nangta bad ka Assam.
Ban iakren hangne, ka mat ka la jrong palat, hynrei, kaba i eh, ka long ba ngi ioh, ia ki jingroi kiba paw tang shabar, katba ka jingroi jong ka jabieng bad ka jingmut jing pyrkhat, kam don shuh, ba tang uwei u ophisar IAS lajong ruh, ngim don shuh ha kine ki sngi bad kaba shai, ka long ba ngi la nang hiar, ia ka ktien lajong, ngi la nang duh ia ki dustur ki riti bad ngi la nang duh ia ki jaka ki puta (namar ha kine ki sngi, ki jaka jong ki riew shimet, ki la lilam lut ha ki kompeni, ha ka sorkar bad ha ki bar Jylla).

Kaba kham pher tam, ka long ba ki nongialam, kiba mynshwa, ki ialam ia u paidbah ban shakri ia ka jaitbynriew; mynta, ki nong ialam, ki mih ban ialam ia ki paralok lajong bad ban shakri ia ki paralok lajong.