Dung U Jitendra, iap ka nong Shillong

Shillong, 24 Risaw:
Mynta ka step ha ka por 9:30 baje, kawei ka nong Shillong ka la shah dung iap ha uwei u nongniah Auto Rickshaw ha Station Rel ha M.G Road Delhi. Utei u nongniah Rickshaw u dei uba la tip kyrteng kum u Jitendra, u la dung kput ia katei ka longkmie bun bunsien na ki bynta u ryndang, dur khmat,kpoh bad na ki bynta jong ki kti. La ioh kynrup ia u da ki paidbah kiba don ha katei ka jaka bad kiba iohi ia katei ka jingjia bad shuwa ba ki pulit kin poi ban kem ia u, ki paidbah ki la ioh ban patrong bad ban bom jem shuwa.
Katei ka longkmie kaba la sha pyniap ka dei kaba la shu khot ka Pinky bad ka trei ha Beauty Parlour ha Rohini, bad ha katei ka por ba jia katei ka jingjia ka dang thmu ban leit sha jaka trei jong ka da ka Rel hynrei kyndit kyndit u Jitendra uba la bud lypa ia ka nadien nadien u la dung ia ka da ki kynja tiar kiba nep. Katei ka longkmie ka dei kaba shong basah ha ka shnong Sirhaul bad la pynkit ia ka sha Civil hospital hynrei ki doktor ki la pynbna ba ka la iap shuwa ban poi sha hospital.
U lok jong katei ka longkmie u ba la tip kyrteng kum u Man Singh u la iathuh ba u Jitendra u ju buddien bad pyndik ia ka lok jong u man ka por , u ju phone ia ka man ka por bad u ju phone ruh ia u, bad u ju byrngem ban knieh noh na u ia ka Pinky , ong u Man Singh uba trei ha Gurugram.
U la iathuh ba la kumba ar bnai eiei ka la mih ka jingiania hapdeng jong u bad u Jitendra hynrei um shym la pyntip pulit satia, bad kato katne minit shuwa ba ka lok jong u kan shah dung u la ong ba ka la phone sha u bad ka iathuh ba u Jitendra u buddien ia ka.
U Man Singh u dei u lo ba-ar jong ka Pinky bad ki la ia shong ia sah lang la kumba 3 snem eiei bad ka la ia phet bad u lok nyngkong. Ka dei ka longkmie kaba na Shillong bad ki hynmen para jong ka baroh ki sah ha Delhi, ka la ioh uwei u khun shynrang na u lok nyngkong.