Duna nongtrei palat – ym ai nongtrei ka sorkar:DTO

Shillong,15 Nailur:
Ka ophis ka tnad District Transport Officer, East Khasi Hills tyngkrain ka la buh da ka jingthoh jan manla ki khyrdop ban rung sha ki kamra ophis ba ki paidbah ki hap ban lum bad ban thep ia ki kot ki sla jong ki tang hapoh ka por 2 baje nohphai sngi namar ba duna nongtrei palat ha katei ka ophis.
Haba iohi ia katei ka jingthoh u Rupang u la leit ban ia kynduh ia u DTO katei ka tnad ban ia kren halor kane , u Bah H.F Khongsit DTO East Khasi Hills u la iathuh ba katei ka jingthoh kam dei shuh kaba phylla hynrei kaba la buh la slem namar ka jingduna nongtrei ban pyndep kam hapoh ophis. Kaba kham sngewsih ka long ba u DTO u la iathuh ba ka tnad jan man ka por ka la pan nongtrei na ka sorkar ban pynbiang ha katei ka ophis hynrei ka sorkar ka la kyntait ban phah nongtrei sha katei ka tnad. “Bunsien ngi la pan nongtrei hynrei ka sorkar ka la kyntait” kren diaw u bah H.F Khongsit .
Ha ka juh ka por u Bah Khongsit u la ong ba ym pat shym la thung nongtrei thymmai ha katei ka tnad mynta la kumba 30 snem eiei, “Ym pat shym la thung nongtrei naduh ba ki la thung 4 ngut ha u snem 1983 na ka bynta ka kam LD” ong utei u ophisar jong katei ka tnad da kaba bteng biang ba la thung kam kham bun ha katei ka tnad ha ka por ba ka dang hap hapoh ka sorkar Assam ha ki snem 1944, 1954 bad kumta ter ter.
Haba la kylli na utei u heh ophisar ka DTO East Khasi Hills hato ia mynta kumba katno ngut ki nongtrei donkam ha katei ka tnad , u Bah Khongsit u la ong ba donkam haduh kumba 20 ngut tam ki nongtrei. “Donkam 15 ngut na ka bynta ka kam LD, 5 ngut na ka bynta ka LUD bad 4 ngut ki Cashier” bynrap biang u DTO.
Shuh shuh u la iathuh ba nalor ba ka tnad ka shem jingeh namar ka jingduna ki nongtrei , hynrei ka sorkar ka dang phah pat ia ki nongtrei sha kiwei patki District kum sha Jowai ne sha Bhoi. “Ka long kaba eh ban ia pyndep kam haba 25% ki kali thymmai ki ju wan ban Register manla u bnai”.
Kaba kham sngewsih shuh shuh ban tip ka long ba man ka por la ju iohi ia ki samla wad kam kiba iakhih ha ki surok da kaba pynlong ki jingiakhih ba bunjait ban dawa kam na ka sorkar katba ha ophis jong ka DTO pat duna nongtrei palat.
Katei ka jingpynduna nongtrei ka sorkar ha katei ka tnad ka wanrah jingeh ym tang ia ki nongtrei ban pyndep ia ki kam jong ki bad ha kajuh ka por ka jingeh kaba kham palat hi ka dei ia ki paidbah kiba lah ban don kiba wan jngai na nongbah Shillong ruh.