Duna ki vote u Pala & UDP- kiew u Pastor 71,348 vote , pyni bor ka BJP ha Shillong

Shillong,16 Jymmang:
Wat la u la jop biang sa shisien ha kane ka kynti kaba mynta pynban la iohi ba ka vote u ma Vincent Pala, u kyrtong ka Congress na Shillong Kon stitwensi ka la hiar iar haba ia nujor bad ki vote kiba

u la ioh ha ka MP Elekshon kaba la long ha u 2009. Haba phai sha u 2009 u Ma Vincent u la ioh haduh 232270 vote katba mynta pat u la ioh tang 209340, kaba pyni ba ka vote jong u ka la jah haduh 22, 930 vote. Haba shim jingkhein ruh katkum ka resol jong u snem 2009, u Ma Vincent u la tam haduh 107868 vote ia u bah John F Kharshiing ka UDP u kyrtong ba wan ba-ar katba mynta ka kynti pat u la tam tang 40379 vote ia u pastor PBM Basaiawmoit uba la wan ba-ar.
La iohi ruh ba haba ia nujor bad ka elekshon 2009, ka UDP ruh ka la hiara bha ha kaba ha ka 2009 ka la ioh haduh 124402 ha ka por ba u bah John F Kharshiing u la iakhun katba mynta pat u bah Paul Lyngdoh u la ioh tang 106817, bad haba ia khein ka vote ka UDP ka la jah haduh 17585 vote.
Haba phai sha ka liang u Pastor PBM Basa iawmoit, la iohi ba u la kiew bha ha kane ka kynti haba ia nujor bad u 2009. Ha u 2009 u Pastor PBM u la ioh tang 97613 baad u la wan ha ka kyrdan ba-lai katba mynta pat u la ioh haduh 168961 vote bad u la wan ba-ar, haba ia khein la iohi ba u pastor u la kiew haduh 71,348 vote na kaba mynshuwa. Shuh shuh haba ia nujor ia ka vote u bah John ba wan ba-ar ha u 2009 bada u Pastor PBM ba wan ba-ar mynta ka kynti la iohi ba ka jingiapher ka long haduh 44559, namarba u bah John u la ioh 124402 vote katba u pastor pat 168961 vote. Shuh shuh kaba kham phylla ka long ba ka seng BJP ka bym shym la pynieng kyrtong ha u 2009, hynrei ka la pyni pat ba ka dei shisha ka seng kaba la lah ban leh bha ha kane ka MP lok sabha 2014 , ha ka ba ka la wan ha ka kyrdan ba saw bad khur haduh 95,979 vote. U Ma Shibun lyngdoh kyrtong ka BJP u la pyni ba watla u wan ha ka kyrdan kaba saw , pynban ka vote kaba u ioh ka jan ia ryngkat ka vote u pastor ha u 2009 , uba la wan ha ka kyrdan ba –lai. U kyrtong ka UDP u bah Paul Lyngdoh u la tam ia u ma Shibun ka BJP tang 10,838 vote. U ma Denis Siangshai , kyrtong shimet mynta ka kynti u la kham hiar haba ia nujor bad u 2009, ha kaba mynta u la ioh tang 5092 vote katba ha u 2009 pat u ioh 7032 vote.