Duna ki kam pynroi ha ka jylla “ka bording, jaka sumar, surok”

Shillong,13 Rymphang:
Ka seng Lok Janshakti Party ka la kam ba ka la leit ban iaid kylleng ki jaka ha ka jylla bad ka la lap ba ki kam pynroi ki dkoh bad ki duna palat naduh ka surok, ka bording, ka jaka sumar, ka um bam umdih, ka khuid ka suba ha kiba bun ki jaka.
U Chief General Secretary katei ka seng u DK Gupta u la ong ba na katei ka jingduna palat ki kam pynroi katei ka seng ka la plie ia ka kynhun treikam jong ka, kaba la tip kum ka Campaign To Fight for Development’ bad ha katei ka kynhun kan don pat sa kawei ka tnad kaba la tip kum ka Public Grievances Committee ka ban peit ia ki jingeh u paidbah ia kaba la thaw hapoh ka jingialam u State General Secretary u Rocky Nongrum bad ia kitei ki jingeh yn phah sha u State President ban mynjur bad ban phah sha ka sorkar jylla bad sorkar pdeng.
Katei ka seng ka la kyntu ia ki Rangbah Shnong, ki Nokma, Seng Longkmie, Seng Samla jogn ka jylla ba kin mih shakhmat ban kdew ia ki jingduna ha ka surok, umbam umdih, ka bording, jingkhuid jingsuba, jaka sumar, ka jingpynjot ia ka mariang bad ki dei ban kdew ia ki jaka bad kin ia kynduh ruh ia ki nongialam katei ka seng.