Duna ka ioh kam ki samla sha Jaintia Hills, ong ka ABVP

Shillong: Ka ABVP jowai unit, ha ka 26tarik Jylliew, ka la leit ai da ka jingthoh ha u Deputy Commissioner ka west jaintia hills ha office treikam jong u ban pynshai halor ka jingdonkam jingiarap ka Deen Dayal Upadhyay Community College, ha Wahiajer ka ba hap hapoh ka jingkhmih ka Nehu, ha ka ban kyntiew bad pynbha shuh shuh ia kane ka college ka ba ai jinghikai halor ka rukom treikam (skilled Training) ia ki khynnah jong ka thain.

Ka ABVP west jaintia unit ka pynpaw ba ka lad ioh kam ioh jam ia ki khynnah jong ka thain ka long kaba duna bha ha jaintia hills bad kumta la i donkam ban pyniar shuh shuh ia ki jait jinghikai ha kane ka college kata ban plie ruh ia ki jingiahikai kum ka Electrician, stenographer, food processing, health care professional bad kiwei kiwei ban iarap bad plie lad ruh haka seng kam lajong.

Shuh shuh ka ABVP jowai unit ka pynpaw ba ka jaka sah (hostel) ka dei ka ba donkam eh ha na ka bynta ki khynnah pule bad kumta ka kyrpad ruh ia ki bor ba dei peit ba kin pynbiang iaki academic building, hostel na ka bynta ki khynnah shynrang bad kynthei, ki Guest House kumjuh ruh ki nonghikai kiba tbit ba kan pynmyntoi shisha ia ki ba wan pule bad shah hikai bad khnang ba ki ioh ia kine ki Training kin lah ban ieng ha la jong ki kjat kum kita ki entrepreneur, ong ka kyrwoh na ka kong Darilin Tang, State Secretary ABVP.