Duna hi ka bynrap-10, halor ki Speaker

B.M.Lanong

Ka jingthmu weng ia ki Lamphang (Speaker) Ing Dorbar Thaw Ain, ka dei ban long tang ha ki khep bakyrpang, lada ki Lamphang ki leh shiliang khmat lane ki shah liang kum ki Nongpyniaid dorbar.

Ka daw ba ki Speaker ki dang long hi ki dkhot ki Seng jong ki, ka dei namar ka Bynrap-10 (Tenth Schedule) hi jong ka Constitution ka don jingbakla, ba ka ieh ha ka mon ki Speaker ba kin iehnoh ia ka jinglong dkhot na ki Seng, shuwa ban jied ia ki kum ki Speaker, katkum ka parakrap 5 (a).

Kam dei ban long ha ka mon kynjai jong ki, ba kin iehnoh ia la ki Seng shuwa ban jied ia ki kum kita ki Speaker. U Bah Metbah ruh u dang don hapoh ka Seng UDP kum u Speaker, namar ba duna katei ka ain. Shawei ruh ki Speaker ki leh kumjuh.
Ka ain ka dei ban shai kdar, ba ki dei ban iehnoh kum ki dkhot ka Seng hapoh 24 kynta hadien ba la dep jied, ym shuwa ban jied.

Ka paragraph 5(b) ka iada ia ki ba ynda ki la kut ka samoi long Speaker, kin kylla long biang ki dkhot ka Seng.
Kumta ka donkam ban pynbeit kloi ia katei ka jingduna ha ka Bynrap-10(a) da ka Sorkar India.

Ka Jingleh ki Speaker Barim
Ha u snem 1991, u Speaker P.R.Kyndiah, hapoh ka paragraph 7 jong katei ka Bynrap-10, kaba ong kumne – “ym don kano-kano ka Ingbishar kaban donbor ban tuklar ia ka jingshah weng ki dkhot (MLA) hapoh ki kyndon jong kane ka Ain,” kumta ula pynduh ia ka jinglong nongmih khmat ki 5 ngut ki MLA Independent-khlem Seng, ba ki don kti ban kyrshan liang.
Sa kawei lei-lei, kaba u Speaker E.D.Marak ha u snem 2001, u shu thom ha la ka mon, khlem ailad ia u Bah E.K.Mawlong Chief Minister tang ba un jubab pynshai ruh, halor ka jingkynnoh pap ka kynhun Congress, ba ula leh palat pud ha kaba aiwai ban tei ia ka Meghalaya House, Calcutta ha ka Asian Housing Limited Co.

Ka dei ka rukom kaba don hapoh ki ain treikam ruh, ba uno-uno uba shah kynnoh u don ka hok ban iada lane ban pynshai.
Kane lei ka jingthmu pynhiar shuki ia u Bah Metbah Lyngdoh kum u Speaker ka Ing Dorbar, kaba la pynlyngngoh ia ki babun, namar ki Congress, tang ia ka daw kaba shai ruh kim shym kdew.
Te hynrei imat ki smiej ioh kyrtoh lyndet bad phalang kylla sha lade halor kitei ki artylli ki jingjia, kumta ki kynran dien noh.