Dumok u lamphang Dorbar, bym ler kam ka EC KHADC

Shillong, 19 Risaw:
U Lamphang ka Ing dorbar ha Khasi Hills Autonomous District Council (KHADC) u la dumok ha ing dorbar ia ka Executive Committee kaba la ialam da u bah Pynshngaiñ N Syiem kum u CEM namar ka jingbym ler jong katei ka EC. U Lamphang bah Mansturdy Nongrem u la ong ba ki don bun tylli ki jingkylli ba ki dkhot ka ing dorbar ki la wanrah bad ki don 54 tylli hynrei napdeng kitei 23 tylli la wanrah ha ing dorbar, katba na baroh kitei ki jingkylli 31 tylli ki dei kiba ka Executive Committee kam lah ban ai jubab bad haba ia kheiñ ia ka percentage ka jinglah jong ka EC ka long tang 42.59%. “Ngi kwah ba ka EC ka dei ban lah 100 na ka shispah” ong u bah Mansturdy Nongrem hapoh ing dorbar.
Lah ban kdew ba ha ka sngi sdang dorbar ka kong Teilinia Thangkhiew ka MDC na Mylliem konstitwensi ka la pynpaw ha ka ing dorbar ba haba ka EC kam lah ban jubab ki EM ki ju ong ba kin phah notis, hynrei haduh ban da long dorbar biang sa kawei ruh ym ioh ia kata ka notis bad katei ka la pynlong ia ki MDC ban wanrah biang ia ka juh shi kajuh ka jingkylli . Halor kane ruh u Lamphang u la dumok ia ka EC ba kam lah ban ai notis sha ki dkhot ka ing dorbar. Shuh shuh u la ong ba baroh ki Proceeding dorbar ym lah ban pynmih bad ym lah ban sam sha ki dkhot jong ka ing dorbar namarba ka jingbym lah jubab ka Executive Committee ia kiba bun ki jingkylli. U la kyntu ia ka Executive Committee ba ka dei ban shim ia ka jingkitkhlieh nangne shakhmat ban pynbiang ia ki jubab khnang ban lah ban pynmih ia ka Proceeding dorbar .