Ym lah ban pynjngut ia ka ain, ong U bah Paul; halor ka jingthmu, ban ailad ban shim jait kpa

Shillong:U myntri ka tnad Social Welfare ka jylla u bah Paul Lyngdoh mynhynnin ka sngi, ula ong ba ka ain kaba la ioh ia ka jingmyn jur u Lat kam dei ban shah pynjngut.

U myntri sorkar ula kren ia kane mynhynnin ka sngi halor ka jingujor ka Hynniewtrep Youth Council pyrshah ia ka shithi kaba la pynmih ka tnad Social Welfare kaba pynbakla ia ka KHAD (Khasi Social Custom of Lineage) Act, 1997, da kaba kdew ba kam khang ban shim jait na u kpa ne na ka kmie bym dei u Khasi.
Haba kren mynta sha ki lad pathai khubor u bah Paul ula ong ba ka Khasi Lineage Act jong ka KHADC kala ioh ia ka jingmynjur u Lat bad ka dei ka ain kaba pura bad kano kano ka jingpynbna na ka sorkar pyrshah ia ka ain kam long kaba shongnia.
“Ka KHAD (Khasi Social Custom of Lineage) ka dei kaba la ioh ia ka jingmynjur na u Lat ka jylla bad kano kano ka jingpynjngut ia ka ain, kam long kaba shong ain” la ong u bah Paul.

Lah ban kdew ba ka Hynniewtrep Youth Council (HYC) ka la dawa ia ka Sorkar Jylla ban weng noh mardor ia ka shithi ba la pynmih da ka Ophisar ka Tnad Social Welfare, kaba pynman bakla ia ka KHAD (Khasi Social Custom of Lineage) Act, 1997.
Dang shen, u President ka HYC Roy Kupar Synrem ula ong baka shithi ka Tnad Social Welfare kala ong “Namar kata, lah ban ong ba ka Lineage Act, 1997 kam shym la khang ban ai ST certificate ia ki nongaplai kiba shim ia ka jait la ka dei na u Kpa ne ka Kmie bad ka jingshim jait sha u Kpa da ki kurim bym dei ki Khasi (bar jylla) ruh la shah”.

Halor kane, ka HYC kala thoh sha ka Khasi Hills Autonomous District Council (KHADC), Shillong, ba pan jingpynshai ba hato ka ain bala thaw da ka KHADC bala tip kum ka KHAD (Khasi Social Custom of Lineage) Act, 1997 ka shah ban ai ST.
U la ong ba haba pynshong nongrim ia ka jingujor jong ka Registration Authority, KHADC, Shillong lyngba ka shithi No. DC.II/RA/24/2023/2 ba 8 tarik Jymmang, 2023, la thoh sha u Under Secretary ka Sorkar Meghalaya jong ka Tnad Social Welfare, ban ai ia ki jingpynshai halor kane ka kam bad kyntu ruh ia ki bor khmih ba kim dei ban ai ia kano kano ka ST certificate ba iaid pyrshah ia ka KHAD (Khasi Social Custom of Lineage) Act, 1997 bad ka Rule bala thaw na kane.

Ka HYC ka la dawa ba dei ban pyndam ia kane ka shithi jong u Under Secretary ka Tnad Social Welfare namar ba ka long kaba beain bha bad kaba iaid pyrshah ia ka riti ka dustur bad kumjuh ruh ia ka ain kaba don kata ka KHAD (Khasi Social Custom of Lineage) Act, 1997 bad ka rule bala thaw na ka.