Duhnong ka MePDCL 60 haduh 70 percent sha Mawsynram, Mawkyrwat

Shillong:Ka jingthmu jong ka MePDCL, ban aiti noh ia ka Mawsynram bad ka Mawkyrwat ba kan sam bor ding bad ba kan lum bai ding sha ka kompeni, kaba na Orissa, ka dei namar ba ki dei ki jaka, kiba ka jingduh nong, jong katei ka tnat ka poi sha ka 60 haduh 70 percent, ong U bah Renikton Lyngdoh, MLA jong ka Mawkyrwat, haba iakren bad U Rupang.
Haba pynsngew ia ka jing pyrshah jong ki Rangbah Shnong jong ka thain Mawkyrwat, U bah Renik, ula pynpaw ba ialade ruh um pat shai bha halor kane ka mat bad ula iathuh ba u dang wad jingshai na U Chief Engineer, Commercial, hynrei u iathuh shuh shuh ba katei ka tnat, ka la pynmih ia ka hukum jongka, ha kaba la aiti sha ka kompeni FEDCO, kaba sdang naduh ka 1tarik Iaiong 2019.
U MLA, u iathuh ruh, ba ula iakren bad u heh jong katei ka kompeni, hynrei, ula pynthikna ba ka bai thang ding, kan nym kylla satia bad ka dor kan long hi kumba ju long bad ula pynshai ruh ba ki nongtrei jong ka MeECL, kiba don ha Mawsynram bad Mawkyrwat, kin iai neh hi bad katei ka tnat, lada kim kwah ban trei noh bad ka kompeni FEDCO bad ka MeECL, kan phah noh ia ki, sha kiwei pat ki jaka ba kin leit trei, lada kim donkam shuh ban trei ha kitei ki Sub Division.
U bah Lyngdoh, ula pynsngew biang, ba un dang wad jingshai na katei ka tnat MePDCL, halor ka jing iakut jongki bad katei ka kompeni bad ula ong shuh shuh “Nga ruh ngam pat shai bad ban ong ba ka bha ruh ngam pat ong bad ban ong pat ka sniew ruh ngam pat ong”.