Duhnong jur ki nongrep, ba shah bat ki kali kit jhur ha Lad Smit

Kum ha kane ka por ka jingiakhun pyrshah ia ka jingsaphriang jong u khniang Corona ngi sngewthuh ba kum ka jylla ngin hap ban iaishah ia shibun ki jingeh. Kane ka kynhun da ka jingkitkhlieh ia ka jingeh jong U Paidbah ngi la phah ia ka shithi ha 4 tarik May 2020 sha U Myntri Rangbah ka Jylla kum ka jingai jingmut halor kiba bun tylli ki mat ki ba kynthup ia ki artylli ki nongrim ba kongsan kata kumno ban iada bad kumno ban iarap ia U paidbah. Ngi kyrmen bad ap khmih lynti ia ka jingshimkhia jong ka sorkar.

1. Mynta ka sngi bun tylli ki kali kit jhur jong ki nongrep ki la shah bat noh ha Lad smit, kane ka la pynduhnong shibun eh ia ki nongrep ki jong ngi. Kane ka long kaba sngewsih namar la sakhi ba ha kawei ka liang pat ki kali kit jhur kit dokha kit dewiong naduh Assam ki poi suk haduh Mawlai. Kawei na ki mat jingai jingmut jong ngi sha u myntri rangbah ha ka 4 tarik bnai May ka long ban khangnoh shwa ia ka jingwan rah ia ki jhur ki mar nabar bad ban pyndon kam shwa da ki jhur jong ki nongrep napoh ka jylla, bad lada don ka jingduna ka sorkar lyngba ka Agriculture department kadei ban shimkhia.
3. Ka sorkar kadei ban pyntreikam pura ha ka lynti kaba pyrkhing bha ia ka Curfew ha baroh ki thain khappud ban khanglad ia ka jingkhaii tuh, khamtam eh ha ki jaka bympatdon sainarshiah. Ka jingioh jingtip ka long ba ka Curfew ha ki border areas jong ka War Jaintia kam treikam bha. La ioh jingtip ruh ba ki khar Bangla ki wan rung tuh mynmiet shaduh Lakroh kaba long kumba 3 km na u pillar, ka jingwan rung tuh jong ki lehse ka lah ban long namar ka jingtieng ia u khniang carona u ba la poi ha Jantiapur ka shnong kaba jngai tang 2 km na border. Mynta ka sngi ruh la ioh jingtip ba ka Assam kan pynpoi khaw ha Mojem ka shnong khappud kaba don ha West Jaintia Hills. Ka thain Elaka Satpator, Amlarem Sub-Division, ka thain Sankhat-Jaliakhola bad kiwei kiwei de ki shnong khappud kiba ka sorkar kan hap ban pyrkhing/peitbniah bha hynrei ha ka juh ka por ka sorkar kadei ruh ban peit pat ba ki paid Hynniewtrep jong kito ki thain kin biang ka bam. Ngim kwah ba yn da la kut ka thma carona ngin iohi ba u pud jong ngi un nangrit nangrit.
5. Ngi la ioh jingtip ruh ba don bun ki nongshongwai ki bala jynjar namar ka jingbymlah ban pynbiang ia ka bai iing. Ka sorkar kadei ban peit bniah ia kane ka phang ban iarap ia ki ba kut lad. Ka jingmap noh ia ka bai iing da ki trai iing ki ba kham don ka jingmih bad ka jingpynduna pat da ki trai iing ki ba kamai tang na ka bai iing kan iarap shibun eh. Naduh ki ba wai dukan, ka tulop ki nonghikai skul private, ki khynnah ki bymlah ban siew ia ka bai skul ter ter, ka sorkar kan hap ban peit bniah bin pa bin ban iarap ia kiba donkam.
6. Ka sorkar kadei ban pyrkhat ban map noh shwa ia ka bai light khamtam eh jong kito ki paidbah ki bymdei ki nongtrei sorkar ki ba sah hi iing shongwai.
7. Ka sorkar ka lah ban phah plié noh ia ki steel fabrication industries(karkhana) ban ioh bylla ki paidbah khamtam eh hadien ba ka sorkar ka la ailad ia ki kam tei building.
8. Ka sorkar kan hap ban phikir bha bad pynthikna ba ha ki quarantine centre dei ban buh da ki kynthei ban pynbiang ia ki jingdonkam baroh jong ki kynthei kiba shah quarantine namar ngi la iohsngew ia ka report ba don kiba thap ban shim kabu ia ki kam sniew.
9. Ka jingkiewdor jong ki marbam mardih kadei kawei kaba la ktah bha ia u paidbah, wat la ka sorkar ka la mana bad byrngem pyrshah ia kino kino kiba shimkabu hynrei ka jingpynkiewdor ia ki marbam mardih ka jur bha, ia kaba ki bor district kin hap ban leh eiei.
10. Kum ha kane ka por don ruh ki paidbah ki kiba shitom ki ba la don ha hospital lane ki ba dang shu shah bat (admit) ha ki hospital, don ki paidbah ki ba wad paralok ban kylliang(replace) ia ka snam ha hospital, hynrei ki shem jingeh namar kum ha kane ka por ba pyrkhing ka iaid ka ieng u paidbah, kumta ka sorkar kadei ban bthah ba ki hospital (public lane private) kim dei ban pynbor than ia ki nongpang lane ia kiba ha iing ki nongpang.

Kum ha kane ka por kiba bun ki paidbah ki don hapdeng ka jingklumar jingmut shaphang ki rai plié iew, pyllait curfew bad kiwei kiwei ki rai ki bapher bapher jong ka sorkar jylla lane jong ki bor administration namar ka jingpynmih khubor ar tylli lane shiteng miet jong ki bor district. Ki ba bun ki nongrep ki ba la pynkhreh kin duhnong da ki lak lada ki rai ki ba la pynmih da ki bor district ki long kiba kyrkieh lane kiba shiteng miet. Kum ha kine ki por ki jingduhnong kiba kum kine kin wanrah ka jingeh kaba kham khraw ia u paidbah bad ki bor District kidei ban shim ia ka jingkitkhlieh lada kim don ia ka daw kaba biang, kumta ngi kyrpad ia ka sorkar ban don ka jingpynbeit (route map) kaba shai khnang ba ki paidbah kin ym klumar jingmut bad ym duhnong.

Shibun ki jingai jingmut kiba ngi la dep ban pynpoi sha U Myntri Rangbah ka jylla namar ngi don ka jingkitkhlieh kum ha kane ka por bad ngi khmih lynti ba ka sorkar kan peit bniah bha ia kine ki jingai jingmut kiba ngi la phah naduh ka 4 tarik May 2020.

Sd/-

Thomas Passah
Spokesperson