Shillong:Ka HSPDP mynhynnin ka sngi ka la kynduh ia u myntri rangbah u Conrad K Sangma ban kyntu ban pynrung noh ia ka ktien Khasi bad ka Garo kum ki official language ha jylla.
Ka jingbym pat ithuh ia ka ktien Khasi bad Garo kala pynduh kam ia ki samla ha ka ïingdak ne post office ha ki kam ba shu thung beit ne direct recruitment bad la ioh ei kiwei ki jaitbynriew bym dei na kane ka jylla namar ba ki bishar tang ia ki marksheet jong ka Hindi bad English.
U General Secretary ka HSPDP u bah Panbor Ryntathiang ula ong ba ha ki kam ba shu thung ne direct recruitment, namar ba ka Meghalaya kam pat ithuh ia ka ktien Khasi bad Garo, ka tnad ïingdak ka bishar ia ki mark jong ki Khasi ia ka sobjek English katba kiwei ki bishar da ka Hindi bad kane kala pynioh kabu ia kiwei ban ioh kam namar ba ki heh mark ha ka Hindi.
U bah Panbor ula ong ba lada ka sorkar kala ithuh ia ka ktien Khasi kum ka ktien sorkar, ki samla Khasi kin kham suk ban ioh kam.
Ha kajuh ka por, ula ong ba ka jingithuh ia ka ktien Khasi kum ka ktien sorkar kan ym pynthut pat ia ka jingpyntreikam ia ka ktien phareng ha ki kam ophis.
Halor kane, u bah Panbor u la iathuh ba u myntri rangbah ula ong ba kan don ka jingeh ban pyllong ia ka ktien Khasi bad Garo kum ka ktien sorkar namar ba hap ban pynkylla ia ki jingthoh, ki file ba bun jait bad kan wanrah ka jingkyrwit jyrwat. Hynrei, na ka liang ka HSPDP ka la kyntu ia u myntri rangbah ban thaw lad namar ba ka ktien phareng kan dei beit ka ktien sorkar ban pyndonkam hynrei, ka donkam tang ka jingithuh ia ka ktien Khasi khnang ban suk ka jingioh kam ki samla.
Naduh ki por mynshwa haduh mynta ki khlem ithuh ia ka ktien Khasi bad ia ka ktien Garo. Da wai sa ka pyrthei ruh kin nym ithuh ia ka ktien Khasi bad ia ka ktien Garo
lada wan u prah next election, la tikna beit hundred percent ki kam👍