Duh jinglong Khasi ar ngut ki khun u Shyam Singhania

Shillong 06 Iaiong:
Ar ngut ki bar jylla ba ai jait Khasi ki la shah rai pynrem ha ka Registration Authority ka KHADC, hadien ba u General Secretary ka Hynniewtrep Youth Council (HYC) u Bah Robert June Kharjahrin.
Kine ki bar jylla kiba ai jait Khasi, ki long u Varun S Lyngdoh bad ka Sheena S Lyngdoh kiba dei ki khun jong u Shyam Singhania.
Haba kren sha ki nongthoh khubor mynta ka sngi, u Bah Kharjahrin u la ong ba kine ki briew ki
shu shim ia ka kyrteng ka jait Khasi tang ban ioh thied jaka, ban khaii pateng, ki kam sorkar bad kane ka dei kaba pynjemdaw ia ka jaibynriew.
“Ban ai jingsneng ia kine ki briew, kiba shim kabu ia ki, ka seng ka la wad jingtip da ka RTI bad la lap ia ar ngut, kynthup u Varun S Lyngdoh bad ka Sheena S Lyngdoh kiba dei u khun jong u Shyam Singhania bad ka Pearl S Lyngdoh na Rock Cliff, Cleve Colony, Dhankheti”, la ong u Bah Kharjahrin.
U la ong ba u Pa ieid jongki u dei u RB Lyngdoh bad ka kmie ieid ka Pamela kaba shu ai jait Lyngdoh tang namar ba kam tip tynrai ia la ka jait. Ka Pearl S Lyngdoh ka khun jongi, ka shongkha ia u Shyam Singhania, bad ki ai da ka Jait Lyngdoh.
Namar kane ka jingai jait Khasi, ki la ioh Scheduled Tribe (ST) jongki hynrei kim ioh ia ka Khasi Tribe na KHADC. “Ban ioh ia ka ST, ki dei ban nang ban kren Khasi, bad kiwei ki jinglong Khasi. Nga la ujor sha u Registratrar ka KHADC namar ba kim lah ban kam Khasi namar ba tang ban kren ban thoh Khasi ruh kim tip”, u la ong.
U la ong ba ki shu shim jait na uta u Pa ieid Khasi (RB Lyngdoh) bad u Khasi ba songkha ia ka dkhar, u hap ban Tang Jait ia ki khun, bad ym lah ban shu kylla ne bud sha u shynrang.
“Hadien ba la iakhun shi snem lynter, ka KHADC ha ka 3 tarik, Iaiong 2017, ka la ai rai ba u Varun S Lyngdoh bad ka Sheena S Lyngdoh kim dei shuh ki Khasi”, la ong u bah Kharjahrin bad bynrap ia kum kine ki briew kiba tuh jait na ka jaitbynriew, ym dei ban ailad, ki shu thied jait na Khyndai Lad, bad ngin buddien namar ba ka DC ophis ka la ai ST ia ki bad ngin leit dawa ban weng noh ia ki, bad ruh na Income Tax ba ki la iaid lait ban siew khajna, ki la thied jaka ruh bun da kaba kam Khasi”.
“Ngi phah khubor kaba shai sha ka jaitbynriew, lada don kiba shim kabu, tang ban ioh jingmyntoi, sa pyntip sha ka seng, ba kan leh ia kaba donkam”, la bynrap u general secretary ka HYC.