Duh ei lai ngut ki shi para kiba na Karimganj, ha ka jingkhlad ki 6 ngut ha krem dewiong

Jowai: Hadien ka jingjia ha u bnai Nohprah 2018, ha kaba 15 ngut ki nongtrei bylla ki la iap jyllop naba shlei kynsan ka krem dewiong ha Ksan (Bri-war) mynta pat ka la jia biang sa shisien ha kaba 6 ngut ki mynsiem ki la duh ei.

Katei ka jingjia ka la jia ha khlaw sorkari ka Elaka Rymbai bad kitei kiba la khlad noh ki dei ki nongbylla ban tih cutting na ka bynta ban trei dewiong.
Ki la hap ha ka khoh nar kaba la ju pyndonkam ban hiar ban kiew namar ba ym shym la don jingkieng namar ba la jylliew palat ka thliew. Katei ka thliew ka jylliew haduh 180 phut ei.

Kitei ki 6 ngut ki dang kiew na poh katei ka krem ban bam ja sngi, hynrei ha ka por ba kiew la iathuh ba u tyllai nar lane u kynja kiar pinion (Gear Pineon) jong katei ka synduk nar khoh dewiong ka la hap ha ryngkat kitei ki hynrei ngut kiba don ha ka bad ki la khlad noh hashen.

Ki pulit ki la ioh ban sei ia baroh ki met bad 5 ngut na ki la ithuh da kiba haiing hasem katba uwei pat haduh mynta ym pat ithuh satia.

Kitei ki nongbylla ki dei uwei na Silchar, 4 ngut na Karamganj ha kaba 3 ngut ki dei shi para trai.
Ia ka metiap jong ki la rah mar syndep sei sha CHC Khliehriat ban pyndep ia ka post mortem bad haduh mynta ka sngi ki doctor ha katei ka jaka ai sumar ki la dep ban pyndep tang 3 ngut.
Haba pyrshang ban iakren bad ki heh pulit ka East Jaintia yn don satia ba treh bad kren wat u SP ruh um shym shim ia ka phone, lada phone katno katno ruh.

Hynrei na ka liang u DC u la ong ba katei ka jaka ka dei kaba tih thymmai bad ym pat don dewiong satia bad la phah tohkit la kadei shisha ne em ba kadei ka jingtih ban khlong ia u dewiong.
U la ong ruh ba ki pulit ki dang tohkit bniah bad lah ban iathuh ia ki jingshisha tang hadien ka jingtohkit jong ki.

Ia ki metiap jong kito kiba la ithuh la iarap ban pynkit da ka ophis jong u DC ban pynpoi sha ki iing ki sem jong ki na ka bynta ban ioh pyndep ia ki jinglehniam ba khadduh.

Ki kyrteng jong kiba iap, ki long U Mokbul Hussain, U Ali Hossain, U Dil War Hussain bad kitei ki dei na Jalalabad,South Sonapur, Ratabari, Dist.Karimganj, Assam bad nangta sa U Jilal Uddin, na katei hi kajuh ka shnong.