Duh dih dawai U Bah Hek, bym pat dep bam ja

Shillong, 2 Nailar:
U Myntri ka tnad ka koit ka khiah ka jylla u Bah AL Hek u la duh ban dih ia u dawai pynbun snam ne u Iron Folic Acid ba ju khot ruh u Blue Tablet namar ba um pat bam ja wat ha ka jingshisha u kwah ban dih nyngkong ha kane ka sngi pynlait ia une u dawai mynta ka sngi ha Soso Tham Auditorium. Haba kren haba pynlait ia ka Weekly Iron Folic Acid Supplementary Programme (WIFS) kaba thmu ia kane ka jingpyndih dawa ia ki khynnah naduh 10 haduh 19 snem, u Bah Hek u la ong, “Ha ka jingshisha nga kwah ban dih ia une u dawai hynrei namar ba ngam pat bam sngi, ki doktor ki la ong ba ym long”, la ong u Bah Hek bad shu pynlait da kaba ai ban dih noh kawei ka khynnah skul kum ka dak ka jingpynlait ia une u dawai.
U la iathuh ba u la dep bam tang ka ja step bad ka kpoh jong u kam pat long ban dih ia une u dawai. Ha kane ka por ba u pynlait ka la long kumba ha ka por 11:30 ei ei mynstep.
U Bah Hek uba kren shwa ban pynlait ia une u dawai, u la ong ba ia une u dawai la ai ei da ka sorkar bad ka jingthmu ka long ban pynbha ia ka jingkoit jingkhiah jong ki khynnah ynda ki la heh da kaba sdang dih ia u naduh katei ka rta.
“ki khynnah ki sngew bang ban bam ia ki jingbam surok kum u alumuri, bad kiwei hynrei kine kim long kiba bha namar ba ki ktah ia ka jingkoit jingkhiah jong ka met, katkum ka jinglap jong ki doktor”, la ong u Bah Hek bad bynra, “kito ki khynnah naduh klas shong klas-6 (10 snem) haduh klas-12 (19 snem) kin hap ban dih ia une u dawai shisne ha ka shi taiew”,.
U la kyntu ia ki khynnah ban pyndonkam tista ia une u dawai kumba la bthah ki doktor khnang ba kan long ka jingmyntoi ia ka jingkoit jingkhiah.
Shwa ia kane, la ioh ruh ia ka jingpyni drama ha kaba la pyni ba kumno ka jingduna snam ka la ktah ia ka bor jabieng jong u khynnah bad tlot ka met.
Da kane ka jingpynlait hynne ka sngi, naduh mynta ka kynti, ki khynnah skul shynrang bad kynthei kiba hapdeng ka 10-19 snem kin hap dih dawai pynbun snam man ka taiew ba la tip kum folic acid ne blue tablet. Ia kane ka Weekly Iron Folic Acid Supplementary Programme (WIFS) la pyntreikam lyngba ka skhim National Rural Health Mission (NRHM).
Ka East Khasi Hills kan long kaba nyngkong napdeng ki district ban pyntreikam ia kane ka WIFS ha kane ka jylla bad yn pynbud sa ha kiwei ki jylla.
Ki khynnah skul kin hap ban dih ia une u dawai man ka taiew ha ka sngi Nyngkong bad yn dih beit ha skul hadien ba la dep bam bad ym shah ban rah sha iing. Nalor ki nonghikai, yn don iarap ki aganwadi ban pyniap na ka bynta kane ka kam.
Ha kane ka sngi kaba la pynlong ruh kum ka Youth Festival 2013 la ioh ruh ia ka jingkren na u Secretary ka koit ka khiah u Bah MR Synrem, u DC ka East Khasi u Sanjay Goyal bad kiwei de.