Ki karkhana rit, ki la duh noh ia 3.5 million tylli ki kam ha ki 4 snem shiteng, ong ka kaiphod jong ka All India Manufacturers Organisation (AIMO). Ka jinglap jong ka AIMO, ka lap ba ka jing pynduh pisa lem bad ka jing pyntrei kam ia ka goods and services tax (GST), ki long ki daw bah kiba ktah ia kitei ki karkhana rit, ong ka AIMO.
Ka kaiphod, ka iathuh ba ki kam kiba la pynduh noh ki long 43 percent ha ka khaii pateng, 32 percent ha ki kam ba rit, 35 percent ha ki jingtrei kam lajong kiba rit bad 24 percent ha kito ki kam kiba shu long pdeng.
Katei ka kaiphod, ka ong ruh ba ki skhim jong ka sorkar India, kum ka Make In India, Digital India, Skill India bad ka Startup India, kim pyn myntoi eiei ruh em ia ki nongtrei kam lajong, tangba ki mynjur pat ba kane ka sorkar kaba mynta, ka dei ka bym don jingbamsap bad kaba kwah ban ia siew ia tda da ka jingsiew onlain.
Katei ka jinglap, ka dei ha ka jingtohkit jong ka AIMO, lyngba ki 34,000 tylli ki karkhana rit kiba don ha India.
Kiba la shah ktah jur ha kine ki sngi, ki long ki nongsuh jain, ki nong khap shniuh, ki nongtrei misteri, ki nongtrei ilektrik bad kine ki la hap ban khang noh ia ki dukan jongki, namar ba ka don ka jing iakhun kaba jur lyngba ka e-commerce bad katei ka la mih ka jingktah jong ka jinghiar ka ioh ka kot bad ka jing ioh kamai jong kitei ki nongtrei kiba rit. Kiwei pat ki kam kiba la shah ktah jur, ki dei kiba shna plastic, kiba shna ia ki ding jingpynbthei, ki misteri maw, ki jaka shon kot, ong ka kaiphod.
“Ka jinglap jongngi, ka long ba ki karkhana rit lane ka TMSME, ka don ha ka jingeh kaba khraw bad ha kane ka por, ka donkam ia ka sorkar India ba kan leh eiei bad leh kyrkieh” ong U K E Raghunathan, National president jong ka AIMO.La ong shuh shuh ba ki kompeni kiba heh kamai ha ki snem 2014-15, ki hiar kamai kynsan ha kine ki snem.
Ka jinglap jong katei ka seng, ka long shuh shuh ba ka sorkar India, ka pyn kylla stet eh ia ki ain bad kam ailad ia ki nongtrei kam lajong, ba kin buddien lane ba kin pyntbit shwa halade ia kitei ki jingthmu thymmai jongka.