Dorkhas ka Congress ban weng noh, ia u lamphang ka dorbar jylla

Shillong:Ha ka 2 tarik u bnai Nailur 2021, ka seng Congress kaba shong sha ka liang pyrshah hapoh ka ïing dorbar thawaiñ ka jylla, ka la phah da ka dorkhas sha ka Secretariat jong ka Meghalaya Legislative Assembly na ka bynta ban wanrah ia ka resolution ban weng noh mardor ia u Bah Metbah Lyngdoh na ka shuki lamphang jong ka ïing dorbar thawaiñ.

Ha katei ka dorkhas ban weng ia u Bah Metbah Lyngdoh na katei ka shuki la soi da ki sawngut ki MLA jong ka seng Congress kiba kynthup ia u Zenith M Sangma, u Bah George B Lyngdoh, u Bah Kimfa S Marbaniang bad u Bah HM Shangpliang bad la aiti sha ka Assembly Secretariat hashwa ba ka ïingdorbar thawaiñ kan pynlong ia ka dorbar synrai jong ka kaban sdang naduh ka 10 tarik u bnai Nailur 2021.

Haba kren sha ki lad pathai khubor, u nongialam jong ka liang pyrshah, u Dr Mukul Sangma u la ong ba kitei ki sawngut ki MLA jong ka seng Congress ki la mudui ia ka dorkhas katkum ka kyndon jong ka Clause(C) jong ka Article 179 jong ka riti synshar ka Ri India bad ka Rule 135 jong ka Rules and Procedure of Business hapoh ka Meghalaya Legislative Assembly.