Dorbar Kur ka Mei sin

Shillong, 29 Naitung:
Ka Executive Committee ka la ia kynduh ha Science Seminar Hall, NEHU, myn sngi sait jain, 27 tarik u Naitung (July), 2013 bad ka la pdiang ia ka kaiphod jong ka Study & Drafting Committee kaba la pynkhreh ia ka riti pyniaid kam jong ka Seng Kur ha kaba la tyrwa ba ka kyrteng jong ka seng Kur kan long “Ka Seng Kur jong ka Mei-Sin bad ki khun jong ka kiba long Majaw, Kurbah, Ba saiawmoit, Hynniewta, Khongji, Syngkli/Sangkli bad Lyngdoh-Peinlang bad haba na kine, la mih na Rapsang Marbisu/Kurbah na Kurbah; Lyngwi, Basa iawrit, Basaiawmah, Basaia wsnai, Nongbri Kynrut na Basaiawmoit; Langpen na Hynniewta; Muktieh, Be, Langi na Syngkli/Sangkli bad Khongwar ne Khongji.
Kat kum ka jingwad jingtip bad jingtih ia ka thymmei, ka iawbei ka dei kata ka Mei-Sin kaba la shong la sah nyngkong ha Rangab, Mukta pur, Hima Sutnga bad kumta, la ia kut ba naduh mynta, ia ka Seng Kur, yn tip noh da kane ka kyrteng kaban kynthup ia kitei baroh ki jaid.
Ka Executive Committee, ka la pdiang ia ka Riti Pyniaid Kam ba la pynkhreh bad mynjur ban phah ia ka sha ka Dorbar Pyllun ka seng Kur ban pdiang, pynskhem bad pyntrei kam.
Kat kum ka Riti Pyniaid Kam, yn don arngut ki Adviser, u President, arngut ki Vice-President, u General Secretary, lai ngut ki Associate General Secretary uwei/kawei na ka bynta ki samla bad iwei na ka bynta ki kynthei, u Treasurer, lai lai ngut ki dkhot ka Executive Committee na kawei kawei ka kpoh kaban bhah iwei na ki kynthei iwei na ki samla ba hapdeng 19-26 snem ka rta.
La ia kut ruh ba ka Dorbar Pyllun (General Meeting) kan long ha ka 31 tarik (sngi saitjain) u Nailar (August), 2013 naduh ka por 11 baje myn step hapoh NEHU campus hi.
Kumta lyngba kane ka jingpynmih khubor, la kyrpad ba baroh kiba dei ki dkhot jong ka Seng Kur kat kum kitei ki kpoh bad tnat bad la dap 19 snem shaneng, kin sngewbha ban pyllait ia katei ka sngi na kiwei kiwei pat ki jingkam bad poi khnang khnang sha katei ka Dorbar Pyllun.
Kumjuh ruh, ba ki Dorbar Kpoh kat kum ba la kdew haneng, ba kin ia long noh shwa ka tei ka sngi long Dorbar Pyllun ban jied ia ki dkhot ka Executive Committee jong ka Dorbar Pyllun bad wanrah ia ka kaiphod trei kam jong ki haduh mynta, ong ka kyrwoh na U Rangbah Edward Kurbah, General Secretary.