Donkam shwa ki ain Riti Dustur, ka VAB hadien, ong u Bah Teinwel

Shillong: U Chief Executive Member (CEM) ba thymmai ka Khasi Hills Autonomous District Council (KHADC) u Bah Teinwel Dkhar u la ong ba ia ka Village Administration Bill (VAB) yn sa peit hadien hynrei kaba donkam eh mynta ka long ban pynlong ain ne codify ban ithuh ia ki riti dustur jong ki shnong, ki Hima, ki Raid.
Haba kren myn hynnin ka sngi sha ki lad pathai khubor hadien ba la shah jied kum u CEM, u bah Teinwel u la ong ba, “Ngi la phah ia ki bill ha ki por ba la dep hynrei ki sah teng bad kane ka dei kaba donkam bha ban pynwan dur ia ka jingtreikam jong ka Council”, u la ong.
U la ong biang, “Hap ban pynbeit ia kane bad ngin shim khia ia ka Village Administration Bill, ban eksamin biang hynrei kaba donkam eh ka dei ka jingpynlong ain ia ki riti dustur jong kito ki Hima ki bym pat leh ia kane”.
Katkum ka jingong u CEM, ka jingbym pynlong ain ia ki riti dustur, ka la pyntlot ia ki shnong ki thaw, ki raid ki hima.
“Ngin phah pynbiang ia ki shnong ki thaw ban pynlong ain ia ki riti dustur namar ba khlem pynlong ain ne codify, ka shong tlot ka synshar ka khadar, ia VAB ia mynta shi por, ngin eksamin bha hynrei ka kham donkam shwa ka jingpynlong ain ne Codify ia ki riti dustur”, u la bynrap.
U Bah Teinwel u la ong ba kaba kongsan mynta ka donkam ban pynwan dur bha ia ka rukom treikam ka Council khnang ba ki Bill kiba la phah kin nym shah kyntait kumba la jia ha ki por ba la dep.
“Ngi donkam ban pynwan dur bha ia ki tnad ha Council khnang lada ngi rah ia ki mat shabar, ngin long kiba jop, balei ki phiel ki mat jong ngi haba phah sha ka sorkar ka long namar ba khlem da pyrkhat, hato lada ki Bill ki poi sha ka sorkar ki long khaw ne kiban jop ne kiban rem, namar ngi dei ban iaid ha ka lynti kaba dei. Ngin leh ia kaba bha tam bad ngin iashong da ka Executive Committee khnang ba ngin ioh ia ki nongtrei kiba lah”, u la ong.
U la ong ba lada donkam wat ban wanrah da ki ophisar MCS, ban pynwan dur bha ia ka tnad Engeneering ban pynkhlain ia ka Council.
“Lada sngew donkam lah ban shim da ki ophisar na ka jylla, ngin pyrshang ngin sa eksamin ia kane”, u la ong bad bynrap, “Ngin buddien ia ki kam ba la leh ka EC barim ka kam Them Iewmawlong jong ki kharmetor, ka jingai license khaïi ia ki bar jylla, ka Bill ILP, Clan Bill, Lineage Bill bad kiwei.