Donkam ki skul ba biang jaka sah ha Shillong & Tura:Dr Don

Shillong, 9 Jylliew:
U nongialam liang pyrshah u Dr Donkupar Roy u la ai jingmut ia ka sorkar ba ka dei ban buh ia ki skul ba biang ki jaka sah ha Shillong bad ha Tura.
“Bun bah ki khynnah pule na jaka nongkyndong kim lah ban siew ia ka bai iing wai ha nongbah. Ka jingdon ki skul ba biang ki jaka kan iarap ia ki ha kaba kin ioh ia ka jingpule kaba kmen bad kaba biang”, la ong u Dr Roy haba iashim bynta ha ka jingiatainia ha ka mang tyngka hynne ka sngi Nyngkong ha iing dorbar. U nongialam liangpyrshah u la ong ba ka sorkar ka dei ban ai ia ka jingpule kaba khlem lut eiei ia ki khynnah kiba dei na ka thain khappud haduh ba kin pyndep ha ka master degree.
U la rah ruh ia ka mat kaba pynslem ban pynlait ia ka pisa na ka skim MGNREGS.
“Nga la ioh ia ka jingujor na ki paidbah ka shnong ia ka jingpynslem ka sorkar ban ai ia ka bai bylla”, la ong u Dr Roy bad bynrap ba ka jingsiew ia ka bai bylla kam dei ban pynslem.
‘Nga kyntu ia ka tnad Community and Rural Development ban peit ia kane ba ka bai bylla ki nongkyndong kam nym slem”, la ong u nongialam liangpyrshah.
Ha kajuh ka por, u la pynpaw ba donkam ban don ka jaka pynieng kali kaba kham bun ha ka nongbah namar ka jingkhapngiah palat khnang ban pynsuk ia ki paidbah bad ki kali ba wan na nongkyndong.
U la ai jingmut ba lada ka tnad kam sor ka jylla kan pynshna ia ki jaka pynieng kali ha Barik da kaba kynriah noh ia ka ophis ka PWD sha kawei ka jaka.
U la kren ruh ia ka jingbym don ka lynti iaid kaba biang na Umshyrpi sha Upper Shillong kaba la buh ka jingma ia ki nongiaid kjat ha kane ka surok bah, bad u la ai jingmut ba ka sorkar ka dei ban shna ia ka Skywalk kumba long ha Mumbai.