Donkam ki jaka hikai saian ha ka dong mihngi, ong u Rijiju

Shillong, 10 Naiwieng:
U Myntri khynnah tnad kam pohiing ka ri u Kiren Rijiju u la ong ba ka dong mihngi ka donkam ban don ka jaka hikai juk stad saian ban ia beh katkum ka jingiaid ka juk stad mynta.
Haba kren ha ka jingialang kaba ar sngi ha St Anthony College, Shillong u Rijiju u la ong ba, ka dong mihngi ka donkam kum ia kane ka jaka hikai ban pynroi ia ka jingstad jong ka saian ha ka thain.
U Rijiju u la plie ia ka Tenth Biennial National Conference jong ka Physics Academy of North East (PANE) kaba ar sngi hynne ka sngi.
U la ong kum u briew ba dei na kane ka thain, u la iakren bad ka tnad Human Resource Development ka sorkar pdeng ia ka jingdonkam ban don ka jaka hikai saian ha kane ka dong mihngi.
“Ngi donkam ia ka jingwad jingbniah, ki jaka hikai bad ka sorkar ka dei ban kyrshan ia kane ban don ha kane ka dong mihngi”, u la ong.
U la ong ba lyngba kane ka jingiatai, kan ai eiei kaba kongsan na ka bynta ban phaikhmat ia ka jingdonkam ha ka jingstad saian ha kane ka thain.
Ha kajuh ka por, u la ong ba u la shim khia bha ban iakren bad ka sorkar pdeng ba ki paidbah na kane ka dong mihngi kim dei ban shah lehbein ha kano kano ka bynta jong ka ri.
Kiwei kiba kren ha kane ka sngi ki long u Archbishop Dominic Jala, u Executive President ka PANE u Prof. Kalyanee Boruah, General Secretary ka PANE u Prof. B.Bhattacharjee, Conference Convener, Dr.S.Chutia nalor kiwei.